Við heimtum há laun og lágt vöruverð. Það er erfitt að verða við þessari ósk því launakostnaður er yfirleitt feitasti liðurinn á útgjaldahlið fyrirtækjabókhalds.
En við höfum samt fundið á þessu lausn, þótt hún sé að öllum líkindum tímabundin.
Lausnin fólst í því að flytja megnið af framleiðsluiðnaði Vesturlanda til Asíu þar sem laun eru nægilega lág til að við getum keypt okkur ódýrar tölvur, ódýra skó, ódýr föt eða nokkurnveginn hvað annað sem við kaupum, fyrir utan matvæli.
Við byggjum efnahagslega velmegun okkar meðal annars á því að láta fólk með lág laun framleiða fyrir okkur vörur; oft á tíðum eru það börn í ánauð sem sauma á okkur merkjafötin.
Neðan á þráðlausa lyklaborðinu sem fylgdi Apple tölvunni minni, stendur að það sé framleitt í Kína og PC tölvurnar sem eru á vinnustaðnum mínum, eru líka framleiddar í Kína.
Ég hallast að því að svo sé um flestar tölvur. Þær eru að einhverju eða öllu leyti framleiddar í Kína af því það er ódýrara að gera það þar en t.d. hér eða í Þýskalandi.
Hef sosem ekki gert nákvæma könnun en mér finnst eins og allt sem við notum og gengur fyrir rafmagni, sé framleitt í Kína eða öðru landi þar sem framleiðslukostnaður er lágur.
Þess vegna get ég ekki fyrir nokkurn mun, sett mig á móralskan háhest gagnvart manninum sem vill kaupa Grímsstaði á Fjöllum vegna þess að það erum við sem kaupum vörurnar sem eru framleiddar í versksmiðjum flokksgæðinga í Kína og ef til vill böðla og stuðlum þannig að ríkidæmi þeirra en um leið ömurlegum aðbúnaði verksmiðjuþrælanna.
Við bjuggum þetta kerfi til, þessar þrælakistur eystra, vegna þess að við viljum lágt vöruverð og kjósum að sjá ekki afleiðingar gjörða okkar þegar fólk veikist og deyr í verksmiðjum sem aldrei myndu fá starfsleyfi hér um slóðir vegna þess að þá yrðu merkjavörurnar of dýrar.
Við högnumst beinlínis á þrælahaldi og þykjumst ekki vita það.
Hvar eruð þið, Gefjun og Hekla?
Björgvin Valur Guðmundsson
Ummæli (4)
Héðinn Björnsson // 6.9 2011 kl. 07:11
Ættum við ekki að gera eitthvað í þessu frekar en að gefast bara upp?
Elín Sigurðardóttir // 6.9 2011 kl. 09:04
Að hinn almenni skuldaþræll lifi í skattaparadís? Er það inntakið?
Eyjólfur Kristjánsson // 6.9 2011 kl. 11:24
Ekki hafa áhyggjur, alþóðakapítalisminn stefnir leynt og ljóst að því að við hittumst á miðri leið. Laun og aðstæður í “Annars heims löndun” lagist eitthvað, en okkar versni mikið þar til allir verði jafnir. Nema náttúrlega þeir sem koma til með að eiga allt klabbið.
Eyjólfur // 6.9 2011 kl. 15:49
“Við heimtum há laun og lágt vöruverð.”
…og viljum bullandi samkeppni um allt nema vinnuafl/laun, eins einkennilegt og það nú er. Annars er ég sammála nafna mínum um að þetta endi væntanlega með einhvers konar hittumst-á-miðri-leið. Ekki vegna neinnar hugmyndafræði eða útfærslu, heldur því það er óhjákvæmilegt. Hvernig ætla menn annars að koma í veg fyrir slíka þróun? Risaviðskipta/tollablokkir sem munu jafnvel leiða til Balkaniseringar hráefnismarkaða o.s.frv? Það mun ALDREI virka! Mun í besta falli tefja ferlið smá, en kostnaðurinn yrði gríðarlegur bæði efnahagslega og pólitískt.
Gleymum ekki að þetta ferli er á örskömmum tíma (í sögulegu samhengi) búið að koma hundruðum milljóna úr örbirgð og sjálfsþurftabúskap inn í millistétt sem getur leyft sér ýmislegt. Fólk verður upp úr því upplýstara um heim og geima, fer að velta fyrir sér borgaralegum réttindum og þar fram eftir götunum. Ekkert nema gott mál.
Rita ummæli