Þriðjudagur 18.3.2014 - 07:47 - 1 ummæli

Eyjan kvödd – nýjir tímar!

Vil þakka Eyjufólki samfylgdina á síðustu misserum. Verð áfram dyggur lesandi á þeim fjölda frábæru bloggara sem þar er að finna.

Hægt er að fylgjast með mér áfram á heimasíðunni minni – Læknirinn í Eldhúsinu!

Svo verð ég einnig með reglulega pistla á Smartlandinu og svo verður ávallt fjör á Facebook, verið velkominn í heimsókn.

Tími til að njóta!

Flokkar: Matur

Fimmtudagur 5.12.2013 - 09:57 - Rita ummæli

Pönnusteiktar kjúklingabringur í hvítvínssoðsósu með ferskum tómötum og svörtum kalamata ólívum!

Ég rataði á þessa hugmynd í morgun þegar ég horfði inn í ísskápinn sem mér fannst heldur fátæklegur að þessu sinni – ekki mikið til! En þá er gott að reyna að liðka aðeins fyrir ímyndundaraflinu og bara einbeita sér að því sem er til. Ég fann tvær öskjur af litlum plómutómötum út í glugga og svo hálfa krukku af kalamataólívum í ísskápnum. Átti nokkrar kjúklingabringur í frystinum. Og þá var það bara ákveðið. Einfalt og laggott! Og ef hráefnið er gott þá eru ekki miklar líkur á því að þetta muni misheppnast.

Margir af réttunum mínum eru með þeim hætti að hráefnalistinn er stuttur en það þýðir að leggja þarf áherslu á að vera með vandað hráefni – svo maturinn verði ljúffengur. Sé þeim kröfum mætt er eftirleikurinn einfaldur.

Ég trúi því varla að það sé kominn desember. Ég er sannfærður að við erum fleiri í þessum sporum. Hvernig má það vera að tíminn þjóti svona hratt framhjá manni. Bara fyrir korteri (1. nóvember) var ég á Íslandi að kynna bókina mína. Fyrir hálftíma (16. október) fékk ég bókina mína í hendurnar. Fyrir þremur korterum lauk ég við að skrifa hana og fyrir rétt rúmum klukkutíma ákváðum við að gera þessa bók. Djísus hvað tíminn flýgur! Eins gott að vera duglegur að njóta hans!

Pönnusteiktar kjúklingabringur í hvítvínssoðsósu með ferskum tómötum og svörtum kalamata ólívum!

Innihaldslýsing

4 kjúklingabringur

4 hvítlauksrif

1 gulur laukur

50 gr smjör

350 gr litlir plómutómatar

20-30 kalamataólívur

1 lárviðarlauf

100 ml hvítvín

300 ml kjúklingasoð

1 tsk hökkuð steinselja

1 msk kapers

salt og pipar

 

Meðlæti

Hrísgrjón

Salat með iceberg, lárperu, rauðlauk, gúrku og fetaosti

Spergilkál

Byrjið á að saxa hvítlaukinn og laukinn smátt niður.

Þerrið bringurnar og saltið og piprið að utan.

Bræðið smjör á pönnu.

Steikið svo lauk og hvítlauk. Saltið og piprið lítilega.

Bætið svo einu fersku lárviðarlaufi á pönnuna (tveimur séu þau þurrkuð).

Skolið tómatana.

Sneiðið tómatana í helminga til að vökvinn fari hraðar úr þeim og blandist víninu og sósunni.

Bætið svo tómötunum og ólífunum út á pönnuna. Steikið í tvær til þrjár mínútur.

Hellið hvítvíninu saman við og sjóðið niður áfengið! Allir alvöru kokkar hefðu fengið sér smá sopa með en ég átti eftir að ná í Valdísi dóttur mína í sund svo ekkert varð úr því!

Hellið svo kjúklingasoðinu saman við og sjóðið upp. Sjóðið síðan niður um helming.

Fimm mínútum áður en kjúklingurinn er tilbúinn setjið þið kapers saman við. Skreytið með steinselju áður en rétturinn er borinn fram.

Með matnum drukkum við þetta ljúffenga hvítvín – ég bloggaði um það nýverið – ég hafði keypt nokkrar flöskur af því. Því var tilvalið að opna eina flösku með þessum rétti!  Wolf Blass Yellow Label Chardonnay frá því 2011. Þetta er ástralskt vín. Létt og frískandi, ávaxtaríkt með sýrukeim. Þetta er fjórða, eða fimmta sinn, sem ég smakka þetta vín – og það svíkur ekki!

 

Þetta var einstaklega ljúffengur réttur með góðu jafnvægi! Þennan á ég eftir að gera aftur.

Núna, loksins núna, er kominn tími til að njóta!

Fylgist einnig með á Facebook: The Doctor in the Kitchen!

Í bókinni minni er fullt af svona einföldum og ljúffengum uppskriftum. Önnur prentun er væntanleg í verslanir í næstu viku!

 

 

 

Flokkar: Matur

Sunnudagur 1.12.2013 - 21:08 - Rita ummæli

Langelduð lambasíða með smjörsteiktum sykurbaunum, gulrótum og einföldu salati að hætti Villa

Þetta er búið að vera einkar ljúf helgi – eins og þær oft eru. Trúi því varla að desember sé þegar kominn. Stundum er það fráleitt hvað tíminn líður hratt – stundum finnst mér bara að það sé alltaf föstudagur. Við erum búinn að hafa í nógu að snúast um helgina, jólainnkaupin eru að fara af stað svo að hægt sé að senda það til Íslands í tæka tíð. Fórum í frábært matarboð til útgefandanna minna, sem voru afar ánægð – tvær bækur á þeirra vegum tilnefndar til íslensku bókmenntaverðlaunanna. Frábært! Svo skutumst við feðgar í sund í dag áður en komið var heim undir kvöld og lagt í þessa máltíð.

Lambasíða er ekki vanalegur matur. En fyrir þá sem taka lamb á haustinn og mylja ekki niður síðuna í kæfu eða útbúa rúllupylsu eins og oft eru örlög síðunnar þá væri hægt að spreyta sig á þessum rétti. Þarna breytir maður ódýrasta hráefni sem völ er á í algera veislumáltíð með nokkrum handtökum.

Lambasíður eru feitar – en bróðurpartur fitunnar eldast burt og skilur kjötið eftir dásamlega meyrt.

Haustið hefur verið milt hérna á Skáni. Kryddjurtirnar mínar hafa það gott út á palli og ég tók eftir því að steinseljan mín var óvænt að spretta upp síðustu daga! Það er ansi ljúft að rölta út á pall og sækja sér ferskar kryddjurtir í desember!

Langelduð lambasíða með smjörsteiktum sykurbaunum, gulrótum og einföldu salati að hætti Villa

 

Innihaldslýsing

2 lambasíður

4 gulrætur

2 rauðir laukar

3 sellerísstangir

6 hvítlauksrif

5 msk jómfrúarolía

1/3 flaska rauðvín

Nokkrar greinar rósmarín, timian og salvía

Salt og pipar

Sykurbaunir

300 gr sykurbaunir

1 msk hvítlauksolía

1 msk smjör

salt og pipar

Fyrir sósuna

30 gr hveiti

30 gr smjör

allt soð af kjötinu síað

1 lambateningur

200 ml vatn

100 ml rjómi

Soya/worchestershire sósa eftir smekk

salt og pipar

Flysjið og skerið niður sellerí, gulrætur, lauk og þrjú hvítlauksrif. Makið upp úr olíu og saltið og piprið.

Lemjið þrjú hvílauksrif í mortéli með salti og pipar ásamt 2/3 hlutum af fersku kryddjurtunum.

Nuddið síðurnar upp úr jómfrúarolíu.

Svo upp úr skvettu af rauðvíni.

Því næst nuddið þið hvítlauks og kryddjurtamaukinu við síðurnar.

Rúllið upp og bindið með snæri

Nuddið ytra byrðið af lambasíðunum með meira af olíu – saltið og piprið.

Þræðið svo restina af kryddjurtunum undir snærið.

Raðið grænmetinu undir. Hellið restinni af víninu ofan í skúffuna ásamt vatninu! Og bakið í 170 gráðu heitum ofni í tvær og hálfa klukkustund.

Látið eitt af börnunum ykkar gera salat.

Þegar kjötið er tilbúið setjið það til hliðar undir álpappír og útbúið sósuna. Bætið vatni og lambateningi í ofnskúffuna og sjóðið upp og skrapið botninn til að ná upp öllum kraftinum. Síið síðan soðið í könnu. Útbúið smjörbollu og hellið soðinu saman við og hrærið af krafti. Bragðbætið með rjóma, soya, salti og pipar eins og við á. Látið krauma á meðan meðlætið er undirbúið.

Hitið hvítlauksolíu/smjör á pönnu og steikið sykurbaunirnar. Saltið og piprið.

Sneiðið síðan rúlluna niður.

Staldrið við í eitt augnablik og dáist að því hvernig ódýrasti matur sem völ er á verður að veislumáltið.

Farið út í garð (1. des – mont, mont) og sækið ferska steinselju. Saxið hana niður og dreifið yfir lambasíðusneiðarnar.

Bjútífúl!

Raðið á disk og njótið!

Með matnum drukkum við þetta ljómandi góða ástralska rauðvín sem er í miklu uppáhaldi hjá móður minni og ég tók með í íslenska tollinum á leiðinni til Svíþjóðar (verðið er svo déskoti gott). Peter Lehmann Futures Shiraz frá því 2009 er kraftmikið, kirsuberjadumbrautt vín. Með góðri ávaxtaríkri fyllingu – örlítið eikað jafnvel kryddað vín!

Núna loksins er kominn tími til að njóta!

Flokkar: Matur

Fimmtudagur 28.11.2013 - 09:52 - Rita ummæli

Ljúffengur lax soðinn í kókósmjólk, thai chilli sósu með papriku, rækjum og kóríanderRR

Ég var á Íslandi um helgina og mikið ósköp var þetta skemmtileg heimsókn. Ég fór af stofugangi á fimmtudagsmorgun á gigtardeildinni á Háskólasjúkrahúsinu í Lundi út á lestarstöð, rápaði þar á milli bilaðra lesta áður en ég komst á Kastrup. Þaðan lá leiðin til Íslands þar sem ég skaust út í Fiskbúðina við Sundlaugaveginn og sótti ýmis konar góðgæti til að taka með mér til Lundar og þaðan fór ég beint í útgáfuteiti hjá Berglindi Guðmundssdóttur sem var að gefa út matreiðslubókina – Gulur, Rauður, grænn og Salt.

Ekki bara er þessi dama hjúkrunarfræðingur, eiginkona og fjögurra barna móðir þá er hún líka þrælöflugur matarbloggari, auk þess sem hún er núna matreiðslubókahöfundur. Þetta er ljómandi góð matreiðslubók með skýra og einfalda framsetningu á fjöldanum öllum af fljótlegum réttum. Hún bauð upp á ljúffenga kjötsúpu í útgáfuteitinu (uppskriftina er að finna í bókinni), og svo fékk ég að smakka hið ljúffenga kúlugott – sem er afar ljúffengt sælgæti sem hún á heiðurinn af að hafa skapað. Kíkið á þessa girnilegu matreiðslubók!

Úr boðinu hennar fór ég heim til foreldra minna og átti náðugt kvöld. Daginn eftir voru upptökur með Rikku fyrir sjónvarpsþátt sem hún er að fara með í loftið þann 5. desember. Ég eldaði smjörsprautaðan kalkún, ljúffenga fyllingu, rósakál með beikoni og fullkomnar ofnsteiktar kartöflur fyrir hana og tökuliðið hennar.

Um helgina var svo fjör í Ráðhúsinu í Reykjavík en var Bókamessa í Bókmenntaborg. Þar fékk ég heiðurinn af því að hitta fjöldann allan af fólki sem margir hverjir voru áhugasamir um bókina mína. Ég bauð upp á snittur sem ég smurði „live“ og svo þegar að líða tók að kveldi, smá rauðvínsdreitil. Ég var með nokkrar flöskur af Spönsku rauðvíni – Coto Vintage frá því 2009 sem er einkar ljúfur sopi. Og líka á góðu verði – flaskan á ekki nema 2000 kr. Það verður að segjast að það er ansi gott verð. Vínið var dökkt í glasi – kirsuberjatónar, aðeins eikað og ávaxtakennt.

Á laugardagskvöldið náði ég meira að segja að skjótast upp í bústað með föður mínum þar sem við áttum ljúfa kvöldstund með ljúffengum mat og drykk og skutumst í pottinn undir stjörnubjörtum himni og síðan í gufu áður en við lognuðust útaf – vel fyrir klukkan ellefu! Daginn eftir var svo aftur allt á fullu í Ráðhúsinu!

Ég náði meira að segja að skjótast í sund áður en við ókum aftur á flugvöllinn. Þvílík helgi! Takk fyrir mig.

Ljúffengur lax soðinn í kókósmjólk, thai chilli sósu með papriku, rækjum og kóríande

Þessi réttur er svona eldaður út úr frystinum og ísskápnum. Ég sótti það sem til var í frystinum – laxaflak og handfylli af rækjum ásamt smáræði af grænmeti og úr varð þessi ótrúlega einfaldi en ljúffengi réttur.

 

Innihaldslýsing

600 gr laxaflak

150 gr rækjur

1 gul papríka

1 rauð papríka

1 stór gulrót

3 hvítlauksrif

5 cm engiferrót

1 lítil rauðlaukur

1 dós kókósmjólk

1 lítil dós sýrður rjómi

1 msk tómatpúré

olía til steikingar

salt og pipar

Skar fyrst lauk, engifer og hvítlauk niður smátt.

Steikti þetta í einni matskeið af jómfrúarolíu þangað til mjúkt.

Skar svo niður papríkurnar og steikti með lauknum.

Næst flysjaði ég stóra gulrót – sem ég síðan skar niður með flysjaranum í þunnar sneiðar og steikti síðan með grænmetinu.

Svo hellti ég saman við kókosmjólkinni, sýrða rjómanum og tómatpúréinu. Hitaði að suðu og lét svo krauma í 20 mínútur til að sjóða aðeins niður. Saltaði og pipraði.

Roðfletti síðan laxinn og skar í fjóra bita.

Tyllti svo laxabitunum ofan í sósuna og lét sjóða í nokkrar mínútur.

Bætti síðan rækjunum saman við. Saltaði vel og pipraði.

Skreytti loks með fersku kóríander.

Með matnum nutum við þessa ágæta hvítvíns sem ég sótti á Kastrup. Þetta er vörumerki sem flestir Íslendingar kannast við og ekki af ástæðulausu. Þetta er ljómandi gott Chardonnay frá Ástralíu frá 2012. Þetta er fallega gullið í glasi, ungt í nefi með miklum ávexti á tungu, melónu og smjörkennt eins og öll Chardonnay eiga að vera!

Rækjurnar voru bara settar í síðustu mínúturnar áður en að rétturinn fór á borðið – þær voru heldur smáar og þurftu bara 3-5 mínútur til að eldast í gegn í varmanum frá sósunni!

Einföld en ótrúlega ljúffeng máltíð. Borið fram með Basmati hrísgrjónum og einföldu salati!

Núna er tími til að njóta!

Hægt er að fylgjast með mér á FB: The Doctor in the Kitchen!

 

Bókin mín fæst núna í öllum verslunum!

Flokkar: Matur

Fimmtudagur 21.11.2013 - 09:14 - Rita ummæli

Lúxus kjötbollur með beikoni, marsala bættri lauksmjörsósu og steiktum eggjum

Ég setti um daginn athugasemd á Facebook síðuna mína – The Doctor in the Kitchen – eitthvað um hvað steiktar „hakkebuff“ bollur með lauk og steiktu eggi væru ljúffengar og það var ekkert lítið sem það innlegg fékk góðar athugasemdir. Mér finnst þetta einmitt herramannsmatur – og það gladdi mig hversu margir voru sama sinnis. Frábær matur þarf ekkert að vera flókinn. Hafandi sagt það þá langaði mig til að prófa að þróa uppskriftina aðeins. Lengi getur gott bestnað.

Mér varð nefnilega hugsað til þeirra skotveiðimanna sem sóttu sér hreindýr á hérað núna í haust og eru kannski að velta fyrir sér hvernig væri hægt að nýta hakkið á skemmtilegan og bragðgóðan hátt – og þá er þessi færsla kannski innlegg í þá umræðu!

Annars er ég á leiðinni til Íslands á morgun. Hlakka virkilega að koma heim aftur á skerið og heimsækja vini og ættingja. En tilgangur heimsóknarinnar er líka auðvitað að halda áfram að kynna bókina mína sem kom út núna á dögunum og hefur fengið sérlega góðar móttökur. Hún er meira að segja kominn í endurprentun! Það gleður virkilega mitt heimska hjarta.

Verð á bókamessu um helgina í Ráðhúsinu – ég ætla að eyða bróðurparti laugardagsins og sunnudagsins að bjóða upp á heimagerðar snittur og léttvín! Vonast eftir því að sjá sem flesta. Það væri gaman að ræða um mat og málefni við áhugasama. Hægt er að lesa meira um þetta hérna – Bókamessa í Ráðhúsinu! 

 

Lúxus kjötbollur með beikoni, marsala bættri lauksmjörsósu og steiktum eggjum

Innihaldslýsing

Kjötbollur og meðlæti

500 gr svínahakk

500 gr hreindýrahakk

1 tsk rósmarín

1 tsk timian

salt og pipar

Egg eftir þörfum

300 gr beikon

Sósan

4 meðalstórir laukar

50 gr smjör

3 msk jómfrúarolía

salt og pipar

50 ml Marsala vín

250 ml kjötsoð

Sósuþykkjari/smjörbolla

1 tsk soya sósa

Ég keypti grísahakk og svo hreindýrahakk – grísahakkið er fyrst og fremst hugsað til að bæta fitu við annars nokkuð fituskert villidýrahakkið.

Vilhjálmur Bjarki (Villi) sá um að hnoða þetta allt saman enda áhugasamur í eldhúsinu!

Það er gaman þegar börnin hafa áhuga á því að vera með í eldhúsinu. Hann er meira að segja farinn að hafa skoðanir á því hvernig bragðbæta á matinn og ennþá mikilvægara hvað honum finnst smakkast best!

Næst var að bæta smátt söxuðum kryddjurtum saman við. Og svo salta vel og pipra.

Við gerðum þrennskonar bollur – allt eftir hvers manns höfði. Ostlausar fyrir Villa. Briefylltar bollur fyrir Snædísi og Valdísi.

Og svo fyrir mig – fylltar með ljúffengum blámygluosti.

Bollunum var síðan velt upp úr smá grófri brauðmylsnu.

Þær fengu síðan að standa í smá stund – þangað til að smjörið bráðnaði á pönnunni.

Þær voru síðan steiktar upp úr smjöri þangað til að þær voru fallegar brúnaðar að utan og svo bakaðar í 180 gráðu heitum ofni í 25 mínútur.

Skar svo laukinn í sneiðar.

Og steikti upp úr smjöri og olíu. Saltaði vel og pipraði!

Bætti svo við Marsala víninu og sauð upp áfengið. Hellti síðan kjötsoðinu á pönnuna og sauð upp. Þykkti með sósujafnara og smakkaði til með salti, pipar og soya sósu! Perfekt!

Með matnum gæddum við okkur á smá rauðvínstári. Að þessu sinni búkollu sem mér hafði áskotnast. Þetta er ítalskt vín frá Sikiley. Gert úr Sangiovese þrúgunni. Fallega rúbinrautt í glasi. Örlítil sýra og kryddaður keimur.

Ljúffengur sopi!

Með fylltu bollunum bárum við fram knassandi steikt beikon, steikt egg og svo létt salat sem Villi hafði hent saman.

Algerlega ljúffengt!

Núna er tími til að njóta!

Hlakka til að sjá sem flesta á bókamessunni núna um helgina!

Mun að sjálfsögðu árita bókina fyrir þá sem vilja – skárra væri það nú!

 

 

Flokkar: Matur

Sunnudagur 17.11.2013 - 19:52 - Rita ummæli

Roast beef sous vide með steiktum lauk, hvítlaukssteiktum gulrótum og kaldri brnaise sósu

 

Ég hef ekki eldað klassískt roast beef lengi – ég hef nokkrum sinnum eldað steikur með sömu aðferð en afar langt síðan að ég gerði nautainnralæri. Að þessu sinni ætla ég að nota sous-vide aðferðina við að elda kjötið. Sous-vide er fólgið í því að loka kjötið inn í plastpoka, helst vakúmpakkað og leggja svo kjötið í heitt vatn, þó ekki heitara en hiti kjötsins á að vera. Td. ætla ég að láta kjötið liggja í 55 gráðu heitu vatni í 3-4 tíma og þannig mun allur kjötbitinn verða fullkomlega eldaður – fallega rauðbleikur. Kjötið er svo steikt í lokin til að brúna það.

Ég ætlaði að hafa remúlaði-sósu með kjötinu en Snædís minnti mig á köldu bernaise-sósuna sem við fengum nýverið hjá Önnu Margréti og Tomma, útgefendum bókarinnar minnar, en hún var afar ljúffeng. Og ekki deili ég við dómarann. Köld bernaise skal það vera.

Ég vil síðan þakka ykkur öllum, sem hafið verið senda mér skilaboð á netinu, fyrir einstaklega hlý orð um bókina mína – fátt gleður mann meira en að heyra að fólk kann að meta það sem maður er að gera. Takk fyrir mig!

Roast beef sous vide með steiktum lauk, hvítlaukssteiktum gulrótum og kaldri bernaise sósu

Innihaldslýsing

1 kg nauta innralæri

pipar

plastpoki

3 laukar

2 stjörnuanís

50 gr smjör

salt og pipar

Kalda bernaise sósan

4 egg

200 gr smjör

75 ml hvítvínsedik

2 greinar fáfnisgras

1 skarlottulaukur

10 svört piparkorn

Skolið kjötið og þerrið. Piprið rækilega og setjið síðan inn í plastpoka eða vacúmpakkið – ef þið eigið slíkan búnað!

Setjið í pott, með 55 gráðu heitu vatni og látið liggja í vatninu í þrjár klukkustundir.

Takið svo kjötið upp úr vatninu í pokanum. Saltið núna yfirborðið rækilega.

Bræðið smjör á pönnu og brúnið kjötið að utan. Látið standa í nokkar mínútur.

Skerið svo niður í sneiðar!

Það er ekki hægt að segja annað en að þær séu fallega rauðbleikar í gegn!

Það þarf líka að huga að sósunni – Kalda bernaise-sósan!

Þeytið fjórar eggjarauður í hrærivél.

Þeytið vel!

Þegar nóg loft er komið í þær hellið þá 200 gr af bræddu smjöri saman við. Hrærið í 20 mínútur og látið svo standa á borði þangað til að sósan kólnar að herbergishita!

Útbúið bernaise-essens. Setjið hvítvínsedikið, fáfnisgrasið, saxaðan skarlottulaukinn og piparkornin saman í pott. Hitið og sjóðið niður í 1-2 matskeiðar.

Blandið þessu síðan saman við smjörið og eggin.

Skerið lauk í sneiðar og steikið í smjöri og steikið 2 stjörnuanísa með (þeir eru fyrst og fremst með til að lyfta umamibragði lauksins).

Steikið laukinn þangað til að hann er fallega gullinbrúnn.

Við bárum einnig hvítlaukssteiktar gulrætur með matnum og smjörsteiktar sykurbaunir. Gulræturnar voru fyrst forsoðnar í 10 mínútur í söltuðu vatni og svo steiktar í hvítlauksolíu – auðvitað heimagerðri!

Við drukkum þetta ljúffenga rauðvín með matnum. Og þetta vín hefur lengi átt sess í mínu hjarta – Montes Alpha Cabernet Sauvignion frá því 2010 – og það er vegna þess að þetta var fyrsta vínið sem ég raunverulega lærði að meta, svona um það leiti þegar maður var að uppgötva vín hérna fyrir einhverjum árum (áratugum) síðan. Alltaf þegar ég toga tappann úr þessari flösku þá fæ ég smá nostalgíu tilbaka til íbúðarinnar okkar í Eskihlíðinni! Og vínið er líka gott. Þétt og þykkt. Ilmar af kröftugum ávexti og eik, með góðri fyllingu. Gott eftirbragð!

Núna er loksins kominn tími til að njóta!

 

Talandi um að njóta þá fæst þessi bók núna í öllum betri bókabúðum og stórmörkuðum!

Flokkar: Matur

Þriðjudagur 12.11.2013 - 12:07 - Rita ummæli

Indversk grænmetiskorma með blómkáli, spergilkáli, papríkum og kúrbít ásamt þurrristuðu naanbrauði

Það er búið að vera mikil kjöthátíð hér um helgina. Við byrjuðum á fimmtudagskvöldið með svínalundir, nautalundir á föstudaginn, kjúkling á laugardaginn og svo kláruðum við helgina með svínabóg á sunnudagskvöldið. Nú varð að breyta til. Og þá er fátt betra en eitthvað hreinsandi eins og t.d. svona grænmetisrétt sem inniheldur smá „kikk“ – smá chili, hvítlauk og engifer – lyftir réttinum aðeins upp þannig að maður svitnar aðeins á efri vörinni við matarborðið.

Oftast hefur það verið bróðir minn sem hefur séð um að elda indverskan mat á mínu heimili. Ekki það sé vegna skorts á áhuga – indversk matargerð er, jú, ákaflega heillandi. En síðustu árin hefur evrópsk matargerð átt hug minn allan – sérstaklega frönsk – eins og sjá má á blogginu mínu síðustu misseri. Kannski tengist þetta þroska – að maður þroski bragðlaukana hægt og rólega og þannig flakki maður ósjálfrátt á milli heimsálfa í leit að einhverju nýju til að örva bragðlaukana. En svo er líka bara gott að fara í stutta heimsókn á önnur menningarsvæði og sækja sér innblástur og fara svo til baka í það sem heillar mann mest. Það er sennilega engin rétt eða röng leið í þessum efnum.

Indversk grænmetiskorma með blómkáli, spergilkáli papríkum og kúrbít ásamt þurrristuðu naanbrauði

Innihaldslýsing

Fyrir kormað:

3 laukar

50 gr smjör

2 msk jómfrúarolía

3 tsk kóríander

3 tsk broddkúmen

8 kardimommufræ

8 negulnaglar

1/2 tsk kanil

6 hvítlauksrif

5 cm engifer

3 chili-pipar

4 msk cashew hnetur

200 ml vatn

1 gul papríka

1 rauð papríka

1 appelsínugul papríka

250 gr spergilkál

400 gr blómkál

2 kúrbítar

250 ml jógúrt

1 dós kókósmjólk

150 ml rjómi

Aðferð 

Skerið niður tvo lauka í sneiðar og steikið í smjörinu þangað til að laukurinn er mjúkur.

Séuð þið með kúmen/kóríander/kardimommufræ er gott að rista þau á þurri pönnu og merja síðan niður í mortéli. Bætið saman við laukinn.

Merjið hvítlaukinn og engiferið í mortéli og setjið saman við laukinn og kryddið.

Næst er að bæta niðurskornum chili-pipar saman við (kjarnhreinsið ef þið viljið mildari rétt), cashew hnetum og svo negulnöglum og kanel. Steikið saman í smástund. Hellið svo vatninu samanvið.

Maukið síðan með töfrasprota og setjið til hliðar.

Sneiðið grænmetið í hæfilega stóra bita. Skerið einnig niður einn lauk og steikið í nokkrar mínútur þangað til að hann fer að taka lit og bætið svo kormablöndunni aftur saman við. Hitið.

Setjið grænmetið ofan í pottinn og blandið saman.

Hellið svo jógúrtinni, rjómanum og kókósmjólkinni saman við. Hitið að suðu og látið krauma á rólegum hita í 25 mínútur þannig að allt grænmetið sé eldað í gegn.

Fyrir naanbrauðið

600 ml hveiti

1 tsk salt

2 tsk þurrger

2 msk olía

3 tsk nýmjólk

200 ml AB mjólk

Aðferð

500-600 ml af hveiti er sett í skál, smávegis af fínu salti og svo tveimur msk af olíu. Þrjár tsk af sykri eru leystar upp í volgri mjólk og svo er gerið sett saman við og vakið í mjólkinni. Mjólkurgerblöndunni er svo blandað saman við hveitið og hrært saman. Um 200 ml af Ab mjólk (eða jógúrt, eða mjólk og Ab mjólk til helminga) hrært saman við og smávegis mjólk. Deigið er hnoðað þar til það verður mjúkt og meðfærilegt og hætt að klístrast við hendurnar á manni. Látið hefast í 30 mínútur (lengur ef það er hægt).

Fletjið deigið út og skerið í hæfilega stóra bita.

Ristið síðan á þurri pönnu þangað til að brauðið fer að taka lit.

Penslið síðan brauðið þegar það er tilbúið með heimagerðri hvítlauksolíu og saltið með góðu salti.

Með matnum drukkum við smá hvítvínstár. Two Oceans Fresh and Fruity sem er vín frá Suður Afríku og samanstendur af blöndu af nokkrum þrúgutegundum – mest Chenin Blanc. Þetta er fínn sopi. Fallega skarpt á litinn. Bragðið með ávexti – skarpt með frískandi eftirbragði.

Berið fram með soðnum hrísgrjónum.

Tími til að njóta!

 

Flokkar: Matur

Sunnudagur 10.11.2013 - 13:18 - Rita ummæli

Grillaður kjúklingur með 40 hvítlauksrifjum og saus velute – heimsótt aftur

Ég verð að viðurkenna að ég hef bloggað um þennan rétt áður. Þetta er svona „revival“ færsla. Það var sumarið 2008 að ég bloggaði fyrst um þennan rétt, sjá hérna. Þá ofnbakaði ég hann, en ég hef líka prófa að steikja hann á pönnu, sjá hérna – sem var líka ljúffengt. Að þessu sinni notaði ég ferskan hvítlauk sem ég fann á grænmetismarkaðnum í gærmorgun og svo líka fáfnisgras (estragon) sem fer alveg sérstaklega vel kjúklingi.

Ég var með fullt hús af gestum í gærkvöldi. Tengdafaðir minn, Eddi og kærastan hans Dórótea, hafa verið í heimsókn hjá okkur síðustu daga. Svo kom bróðir minn og kærastan hans suður frá Stokkhólmi og til að slá upp alvöru partíi bauð ég líka útgefendunum mínum, þeim Tomma og Önnu Margréti og svo auðvitað öllum krakkaskaranum. Þetta varð ljómandi góð veisla. Og það var alveg ástæða til að fagna – allavega fannst mér það. Það er nú ekki á hverjum degi sem maður sér bók eftir sjálfan sig á metsölulista – númer eitt í bókaflokknum hand-, fræði- og matreiðslubækur, og svo númer tvö á metsölulistanum á eftir sjálfum Arnaldi Indriðasyni! Maður lifandi – hvað ég er glaður með þetta!

Og þá er bara um að gera að lyfta glösum og skála! Skál!

Grillaður kjúklingur með 40 hvítlauksrifjum og saus velute – heimsótt aftur

Fyrir kjúklinginn;

1 kjúklingur

40 hvítlauksrif í pappírnum

20 gr smjör

1 tsk fáfnisgras

Salt og pipar

 

Fyrir meðlætið;

1 kg blandaðar gulrætur

1 msk andafita

1 msk hunang

salt og pipar

Fersk steinselja

 

Fyrir sósuna;

600 ml kjúklingasoð (auk þess sem fellur til við eldun kjúklingsins)

30 gr smjör/30 gr hveiti (smjörbolla)

150 ml rjómi

salt og pipar

(soya og sulta ef þarf)

Ferskur hvítlaukur er bragðmikill og eilítið hastur og er ofsalega góður bakaður þar sem bragðið þróast og verður sætt og kraftmikið.

Fáfnisgras er bragðgott krydd – það er með anískeim og þekktast fyrir þáttöku sína í bernaise sósu en á erindi mun víðar eins og í þennan rétt. Fáfnisgras á fastan sess í franskri matargerð og tilheyrir flokknum fines herbes ásamt kerfli, steinselju og graslauk.

Ég bræddi 75 gr af smjöri sem ég penslaði kjúklinginn með.

Skar niður fáfnisgrasið og dreifði yfir kjúklinginn ásamt ríkulegu magni af salti og pipar. Setti hvítlauk inn í hvern kjúkling og svo restina í kring.

Setti kjúklinginn út á grill, á óbeinan hita við 200 gráður og bakaði í einn og hálfan tíma þangað til kjarnhiti fuglsins var kominn í 84 gráður.

Sá þessar fallegu gulrætur á markaðnum í morgun og það var nú ekki hægt að standast þær. Keypti fjólubláar, gular og svo auðvitað venjulegur nýjar gulrætur.

Velti gulrótunum upp úr einni matskeið af bræddri andafitu og einni matskeið af hunangi. Og svo er auðvitað saltað og piprað. Bakað í forhituðum ofni, 180 gráður í rétt rúman klukkutíma.

Síðan voru gulræturnar færðar yfir í skál og nokkrum ferskum steinseljulaufum sáldrað yfir.

Kjúklingurinn heppnaðist ljómandi vel – var lungamjúkur og ljúffengur.

Gerði einfalda sósu með matnum. Átti kraftmikið kjúklingasoð sem ég sauð upp og þykkti með smjörbollu. Hellti svo kraftinum af kjúklingum samanvið. Rjómaskvetta, salt og pipar og leyft að sjóða í nokkrar mínútur. Voila.

Við skáluðum í ljúffengu kampavíni sem Anna Margrét og Tómas komu með. Veuve Clicquot Ponsardin Brut – sem alla jafna gengur undir nafninu Gula ekkjan. Þetta er vín sem á sér langa sögu. Fyrirtækið var stofnsett 1772 af Philippe Clicquot en þegar hann lést 1805 tók eiginkona hans, Barbe-Nicol Ponsardin, yfir reksturinn og einbeitti sér helst að kampavínsframleiðslunni. Hún var ein af fyrstu viðskiptakonunum í Frakklandi og undir hennar stjórn óx fyrirtækið og er í dag einn af risunum á kampavínsmarkaðinum.

Þetta er ljómandi góður sopi. Fallega strágult í glasi, léttur ilmur sem springur út í munni með léttum ávexti og mildum sítrónukeim!

Tími til að njóta!

Flokkar: Matur

Föstudagur 8.11.2013 - 10:26 - Rita ummæli

Gómsætar steiktar grísalundir með sveppum og seiðandi madeirasósu

 

Þetta hefur verið ákaflega spennandi og skemmtileg viku. Fyrir viku síðan kom ég til Íslands að halda útgáfuteiti í tilefni af útgáfu bókarinnae minnar. Henni var ákaflega vel tekið og það var fullt af fólki í veisluna sem haldin var í Eymundsson Skólavörðustíg, svo mikið að bókin seldist upp í búðinni tímabundið og það þurfti „akút“ að sækja fleiri. Um helgina fór ég í skemmtilegt viðtal hjá Guðrúnu Gunnars á Rás 2, náði að hitta fullt af gömlum vinum, tók upp auglýsingar, bauð allri fjölskyldunni í mat, fór oft í sund og rétt áður en hoppað var upp í flugvél á leiðinni tilbaka til Lundar stoppaði Marta María í Smartlandinu hjá okkur og ég náði að elda fyrir hana hádegismat. Þvílíkt fjör.

Þegar heim var komið tók ég við gigtardeildinni – fullt að spennandi viðfangsefnum sem bíða manns í dagvinnunni. Það er ekki hægt að segja annað en að þetta séu annasamir, örvandi og skemmtilegir tímar. Ég hlakka til næstu vikna, vinna á gigtardeildinni, blogga, kynna bókina mína og svo sérstaklega að koma heim til Íslands aftur þann 21. nóvember og taka þátt í bókamessunni í Ráðhúsinu. Vona að fólk kíki í heimsókn. Er að skoða möguleikann að fá að elda eitthvað fyrir gesti og gangandi – sjáum hvernig rætist úr því verkefni. Það væri gaman að koma með paellugræjurnar heim og snara einhverju fram!

Í kvöld fengum við góða gesti í heimsókn, Eddi tengdafaðir minn og svo Dórótha stjúptengdamóðir mín. Það var því um að gera að reyna að elda eitthvað almennilegt handa þeim!

Gómsætar steiktar grísalundir með sveppum og seiðandi madeirasósu

 

Madeiravín á rætur að rekja til eyju vestur af Afríku sem ber sama nafn. Portúgalar fundu eyjuna 1419 og námu land þar árið eftir. Á sextándu öld var vínrækt orðin rótgróin á eynni. Þetta varð fljótt vinsæll áfangastaður sæfara sem vildu hafa með sér vín til drykkjar. Til að koma í veg fyrir að vínið skemmdist á ferðalögum til Nýja heimsins tóku menn til þess bragðs að styrkja vínið með sterku áfengi og sykri til að hindra að það eyðilegðist. Á ferð sinni um heiminn tók vínið að breytast – bragðið að þroskast og úr varð Madeira vínið sem núna er heimsfrægt. Ætli það hafi þó ekki verið frægara á árum áður – alltént kemur uppskriftin fyrir í bókum Auguste Escoffier sem afbrigði af móðursósunum – þar sem þykkt brúnt soð er bætt með Madeira víni – og verður ákaflega ljúffengt!

Innihaldslýsing

1 kg grísalundir

300 gr sveppir

1 gulur laukur

3 hvítlauksrif

3 lárviðarlauf

5-6 greinar ferskt timian

100 gr smjör

Salt og pipar

 

Fyrir sósuna;

600 ml dökkt kjötsoð (heimagert – eða úr krafti)

100 ml madeira

smjörbolla (40 gr smjör/40 gr hveiti)

1 tsk soya sósa

1 tsk góð sulta

1/2 tsk Worchehestershire sósa

50 ml rjómi

salt

pipar

 

Jæja – nú byrjum við;

Byrjið á því að skera einn rauðlauk og þrjú hvítlauksrif smátt. Steikið á pönnu með 30 gr af smjöri. Saltið og piprið.

Skerið sveppina í helminga eða fjórðunga eftir stærð og bætið á pönnuna, ásamt 30 gr af smjöri til viðbótar og svo skvettu af jómfrúarolíu. Bætið þremur lárviðarlaufum á pönnuna. Saltið og piprið. Þegar laukurinn og sveppirnir eru fallega brúnaðir – takið þá af pönnunni og setjið til hliðar.

Hreinsið tvær svínalundir og þerrið vel – vel þurrt kjöt karmelliserast betur!

Skerið svínalundirnar í medalíur cirka 3-4 sentimetra á hæð. Saltið og piprið.

Bætið núna afganginum af smjörinu á pönnuna og bræðið og þegar smjörið hefur þagnað (hættir að freyða), raðið þá svínamedalíunum á pönnuna og brúnið í stutta stund á báðum hliðum.

Setjið síðan í eldfast mót, raðið sveppunum ofan á og skreytið með grein af fersku timiani. Setjið inn í ofn við 180 gráður og bakið þangað til að kjarnhiti er kominn í 65 gráður.

Á meðan útbúið þið Madeira sósuna. Fyrst hellið þið 50 ml af Madeira á pönnuna sem sveppirnir og kjötið var steikt í til að „deglaze“ og ná upp öllu gúmmelaði sem varð til við steikinguna.

Hitið 600 ml af heimagerðu kjötsoði (sjá síðu 335 í Lækninum í Eldhúsinu) eða notið teninga. Þykkið með smjörbollu (bræða smjör á pönnu, hellið hveiti saman við og hrærið í bollu) og bætið svo soðinu við. Þeytið vel á meðan. Saltið og piprið og smakkið til með sultu, soya og Worchestershire sósu.

Raðið svo á disk og skreytið með steinselju.

Með matnum drukkum við þetta ljómandi góða rauðvín frá Spáni – Baron de Lay Gran Reserva frá því 2004. Þetta er 100% Tempranillo vín. Fallega kirsuberjarautt í glasi. Þroskað vín – eikað með þurrkuðum ávexti. Bragðið berjaríkt og létt kryddað. Ljómandi góður sopi.

Berið fram með hrísgrjónum og svo einföldu salati.

Tími til að njóta!

Svo verður heilmikið um að vera á Facebook síðunni minni – Doctor in the Kitchen!

 

 

Flokkar: Matur

Miðvikudagur 6.11.2013 - 10:02 - Rita ummæli

Pizza bianca með heimagerðri hvítlauksolíu, klettasalati og parmaskinku

Þessi færsla birtist nýverið á blogginu – Gulur, rauður, grænn og salt – sem matarbloggarinn snjalli Berglind Guðmundsdóttir hjúkrunarfræðingur stýrir-  Ég fékk að vera gestabloggari hjá henni!. Til að halda öllu til haga þá set ég þetta inn á bloggið mitt líka.

Svo nálgast fimmhundruðusta færslan óðfluga. Hvað ætli það verði?

Eins og flestir á mínum aldri þá höfum við verið svo gott sem alin upp á pizzum. Mamma eldaði gjarnan flatböku á föstudagskvöldum þegar ég var lítill. Hún hafði smakkað pizzu sjálf á fullorðinsaldri þegar hún starfaði sem flugfreyja fór út á pizzeríur þegar hún var í stoppi í New York. Hún tók þessa kunnáttu með sér heim og gladdi okkur heima með sínum eigin útgáfum. Bolognesesósan hennar endaði gjarnan sem pitsuálegg daginn eftir, okkur bræðrunum til mikillar ánægju. Það er merkilegt hvað flatbökur eru verðlaunandi og það er eiginlega erfitt að þykja nokkur flatbaka vond.

Ég var 14 ára þegar Pizzahúsið fór að keyra heim flatbökur og við það stórmagnaðist flatbökuneyslan. Við vinirnir lögðum gjarnan í púk fyrir 18 tommu margarítu. Eldsmiðjan hafði þá verið til í nokkur ár en var bara keypt við sérsök tilefni – eldsmiðjupizzur voru auðvitað betri og því miður dýrari! Ég hef meira að segja starfað sem pizzasendill – en það var hjá Dominos, sem selja pizzur sem ég dag mér finnst ekkert merkilegar – alltof mikið brauð!

Svo þegar ég fór að búa sjálfur og áhuginn á matargerð jókst ennfrekar fór þetta að verða vikulegur viðburður. Síðan þá hef ég gert hundruðir ólíkra flatbaka. Sumar frábærar, sumar góðar og aðrar bara venjulegar – en alltaf getur maður borðað pizzu!

Pizza bianca með heimagerðri hvítlauksolíu, klettasalati og parmaskinku

 

Ég fékk flatböku nýverið hjá vinum mínum og fannst hún alveg dásamlega góð. Hún er frábrugðin minni hefðbundnu uppskrift að því leyti að notað er gróft spelt og enginn sykur er notaður til þess að vekja gerið. Deigið er blandað og látið hefast í nokkra tíma. Munið að spelt þarf að hnoða vel. Síðan er deigið flatt út mjög þunnt og forbakað í eina til tvær mínútur.

Auðvelt er að kaupa parmaskinku út í búð – en fyrir þá sem vilja prófa að gera sína eigin, sjá hérna og svo er framhaldið sex mánuðum síðar, hérna!

Fyrir speltpizzabotninn

Hráefnalisti

 

500 g gróft spelt

300 ml vatn

15 g ferskt pressuger

4 msk jómfrúarolía

4 tsk sjávarsalt

 

1. Blandið saman öllum hráefnunum í hrærivél og hnoðið deigið 10-15 mínútur.

2. Látið deigið hefast í tvær til þrjár klukkustundir.

3. Fletjið það svo út mjög þunnt.

4. Forbakið í eina til tvær mínútur í ofninum eða á grillinu.

5. Raðið svo álegginu á botnana og bakið aftur í fjórar til fimm mínútur

 

Pizza Bianca

1 speltbotn – sjá ofan.

Handfylli mozzarellaostur

2 msk hvítlauksolía

5-6 sneiðar parmaskinka

2 handfyllir klettasalat

2 msk þurrsteiktar furuhnetur

1. Penslið hvítlauksolíu á botninn og dreifið ostinum ofan á.

2. Bakið í fjórar til fimm mínútur þangað til osturinn er bráðinn.

3. Raðið síðan álegginu ofan, fyrst klettasalatinu og svo þunnt skorinni parmaskinku.

Dreifið smáræði af jómfrúarolíu yfir og berið fram með hvítvínsglasi.

Núna er kominn tími til að njóta!

 

Flokkar: Matur

Eyjan Media ehf. - Kringlunni 4-12, Reykjavík - eyjan(hjá)eyjan.is