Fimmtudagur 07.03.2013 - 13:47 - FB ummæli ()

Svikið loforð

Vanvirðing þingmanna og þingsins við þjóð sína virðist hafa náð nýjum hæðum. Sú óvirðing sem Alþingi sýnir landsmönnum, þegnum þessa lands, með því að ætla að klúðra stjórnarskrármálinu vísvitandi, að því er virðist, er yfirgengileg. Ný stjórnarskrá var kosningaloforð. Ég bauð mig fram til þings fyrir Borgarahreyfinguna og þetta var eitt af okkar aðalmálum og þetta er enn eitt af stóru málunum í mínum huga.

Framsóknarflokkurinn auglýsti grimmt fyrir síðustu kosningar. Hann lofaði stjórnlagaþingi, hann lofaði auknum völdum til fólksins. Af hverju stendur flokkurinn ekki við loforð sín?

Stjórnlagaumbætur voru líka baráttumál stjórnarflokkanna og ég skil vel að kjósendur þeirra séu reiðir. Ný stjórnarskrá var hins vegar ekki baráttumál Sjálfstæðisflokksins. Hann barðist hart gegn þeirri hugmynd að breyta 79. gr. á síðasta þingi til að auðvelda stjórnarskrárbreytingar á því kjörtímabili sem nú er brátt á enda. Sjálfstæðisflokkurinn er því ekki að svíkja sína kjósendur sína, þvert á móti, Sjálfstæðisflokkurinn er að efna kosningaloforð sitt og flestir aðrir virðast ætla að aðstoða hann við það. Allir hinir svíkja því kjósendur sína.

Framsóknarflokkurinn í heild sinni svíkur kjósendur sína. Það er sorglegt því að mér virðist mikill meirihluti þingmanna stjórnarflokkanna, þingmanna utan flokka og sannarlega líka þingmenn Hreyfingarinnar vilja klára málið núna, ekki seinna, enda er ekkert að vanbúnaði. Stjórnskipunar- og eftirlitsnefnd hefur velt við hverjum steini og flestir stjórnarþingmenn hafa farið ítarlega yfir bæði nefndarálitin og frumvarpið og allar breytingartillögur. Þau sjá það sem liggur í augum uppi, að málið er tilbúið.

Það eina rökrétta í stöðunni er að klára málið. En hvar er þá fyrirstaðan? Af hverju er vísvitandi verið að sigla málinu hratt og örugglega í strand? Af hverju vilja menn ekki klára málið núna? Af hverju vilja menn ekki lúta þjóðarvilja. Hvernig dirfast þingmenn að búa til þá atburðarás sem nú er að opinberast? Er það kannski vegna þess að með nýrri stjórnarskrá er verið að færa völd til almennings frá stjórnmálamönnum og hagsmunaaðilum? Er það kannski vegna þess að með nýrri stjórnarskrá færum við þjóðinni arð af auðlindum sínum í stað þess að láta örfáa einstaklinga hirða hann? Er það út af því? Eða vilja menn ekki að þegnar þessa lands njóti aukinna mannréttinda?

Er það vegna aukinna krafna um upplýsingagjöf vegna fjármála frambjóðenda og stjórnmálaflokka eða krafna um hæfi þingmanna til að taka þátt í málum sem snerta með beinum hætti þá sjálfa eða fólk þeim nákomið? Eða er það kannski 95. gr. um upplýsinga- og sannleiksskyldu ráðherra þar sem kveðið er á um að ráðherra beri alltaf að gefa réttar upplýsingar? Hentar það kannski ekki eða er það óraunhæf krafa? Ég spyr.

Heildarendurskoðun á stjórnarskrá hefur staðið til síðan 1944. Þingið hefur ekki ráðið við það verkefni en þegar botninum var náð hér í kjölfar allsherjarhrunisins haustið 2008 áttaði þingið sig á því að það þyrfti að gera eitthvað til að breyta og fól þjóðinni verkefnið. Ferlið hefur vakið aðdáun umheimsins og öllum landsmönnum hefur margsinnis verið boðið að borðinu á ýmsan hátt til þátttöku.

Í ræðu sinni í gær benti Valgerður Bjarnadóttir á muninn á vinnubrögðunum nú og síðast þegar stjórnarskrá hefur verið breytt:

Árið 1995 tók sjö klukkustundir og 15 mínútur að afgreiða í þremur umræðum mannréttindakafla í stjórnarskrána. Sjö klukkustundir og 15 mínútur. Reyndur maður benti mér á að það hefði verið lengi unnið að þessu, heil tvö ár. Væntanlega hafa það verið fimm eða sjö gráklæddir karlar uppi í ráðherrabústað með sérfræðinefnd með sér, borðað saman einu sinni í hádeginu einu sinni í mánuði. (Gripið fram í.) Og þeir komast að þessu. Og þetta var mjög vel undirbúið. Hvað er búið að gera núna? Við erum búin að vera með stjórnlaganefnd, 900 manna þjóðfund og stjórnlagaráð þar sem 500 vildu vera. Við höfum rætt þetta á ótal fundum, við höfum velt öllum steinum við. (Gripið fram í.) Og svo ég gleymi ekki kosningunni 20. október þar sem 50% tóku þátt, sem er mjög mikil kjörsókn á mælikvarða slíkrar kosningar. 67% vildu byggja á þessum tillögum sem heiðarlegt fólk í þessu heiðarlega landi, a.m.k. hluti landsins er heiðarlegur, hefur unnið að. Og ég spyr: Hvað er okkur að vanbúnaði að taka að minnsta kosti inn mannréttindakaflann?

Sjálfstæðisflokkurinn er ekki að svíkja einn eða neinn. Svikin eru annars staðar. Samkvæmt minni „hausatalningu“ vilja fleiri þingmenn en færri standa með málinu en sem fyrr þora menn ekki að standa fyrir máli sínu. Ég ætla ekki að svíkja þessa þjóð. Ég ætla að reyna að gera allt sem ég get til þess að klára málið á þessu þingi svo það næsta þurfi aðeins að samþykkja það. En ég lýsi hér eftir hugrekki og heiðarleika á Alþingi og að menn standi við það sem þeir lofa.

Flokkar: Óflokkað

«
»

Facebook ummæli

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli.
Tilkynna má óviðeigandi ummæli í netfangið ritstjorn@eyjan.is

Eyjan Media ehf. - Kringlunni 4-12, Reykjavík - eyjan(hjá)eyjan.is