Miðvikudagur 02.11.2011 - 22:36 - FB ummæli ()

Skráargatið

Stundum heyri ég því fleygt að Alþingi fjalli sjaldnast um neitt sem skiptir máli. Venjulega fylgir að ekkert sé gert fyrir heimilin sem máli skiptir og menn rífist allan daginn. Undir það get ég vel tekið. Hins vegar eru oft lögð fram ýmis þjóðþrifamál á þingi sem ekki varða skuldastöðu heimilanna eða þann bráðavanda sem varð til við hrunið en eru engu að síður þörf og góð. Eitt þeirra er um norræna hollustumerkið skráargatið. Merkið er ætlað til að merkja þær matvörur sem hollastar eru í sínum flokki og auðvelda fólki þannig að velja hollan mat. Nú nýlega bárust okkur fréttir af því að íslendingar séu meðal feitustu þjóða í heimi og þannig viljum við ekki hafa það. Hver og einn á að vera ánægður í eigin skinni en þó verður ekki hjá því komist að líta til þess að offita er orðið gríðarlegt heilbrigðisvandamál sem dregur úr lífsgæðum fólks, hefur í för með sér ýmsa óæskilega fylgikvilla svo sem hjarta- og æðasjúkdóma, sykursýki og ýmsar tegundir krabbameins, stoðkerfisvandamál og sálræn sem félagsleg vandamál. Auk þess að skerða lífsgæði þeirra sem eru of þungir er vandamálið einnig afar dýrt fyrir samfélagið og eykur álag á heilbrigðiskerfið. Það er því til mikils að vinna að auðvelda fólki að velja hollustu matvörurnar og lifa heilbrigaðara lífi.

Við lifum á tímum mikilla upplýsinga. Einhvern tíma heyrði ég því fleygt, og veit svo sem ekki hvort það er vísindalega sannað, að eitt dagblað nú á 21. öld innihéldi meiri upplýsingar en venjulegur maður á 19. öld fékk alla sína ævi. Allar þær upplýsingar sem dynja á okkur alla daga geta verið og eru stundum afar misvísandi.

Ég byrjaði að drekka te þegar ég var unglingur vegna þess að ég var mikið í Bretlandi og þar var alltaf verið að bjóða upp á slíkt. Í Bretlandi drekka krakkar og unglingar yfirleitt te með mjólk og þannig drakk ég teið mitt lengi vel. Svo las ég um einhverjar rannsóknir sem sýndu fram á að þeir sem drykkju te með mjólk myndu auka líkurnar á að fá hjartasjúkdóma þannig að ég vandi mig af mjólkinni og eftir það hef ég bara drukkið te án mjólkur. Nokkrum árum síðar las ég um aðra rannsókn sem sýndi fram á að ef maður notaði ekki mjólk í teið ætti maður á hættu að fá einhverja ristilsjúkdóma en hefði maður mjólk í teinu væri sú hætta ekki fyrir hendi. Í mínum huga stóð valið því um hjartasjúkdóma eða ristilsjúkdóma. Ég ákvað að halda mig við svart te. Auðvitað hefði ég getað skipt yfir í aðra drykki en þá koma til enn fleiri rannsóknir sem sýna fram á að te er hollara en kaffi, sérstaklega grænt te eins og ég drekk mest.

Það getur verið erfitt fyrir venjulegt fólk að fóta sig í upplýsingaskóginum. Það hjálpar svo ekki þegar við bætast auglýsingar sem geta verið mjög villandi og ýmislegt sem auglýst er sem heilsuvara er alls ekki holl vara ef nánar er að gáð. Við erum líka með ýmsa sjálfskipaða sérfræðinga á þessum næringar- og heilsumarkaði sem eru hreint ekki sérfræðingar í nokkrum sköpuðum hlut og hafa jafnvel sett fram ýmsar bábiljur sem erfitt er fyrir venjulegt fólk að átta sig á hvort séu réttar eða rangar. Á hverju einasta ári fáum við nýja leiðarvísa, megrunarkúra eða heilsuvörur, og alltaf sprettur fram ný töfralausn.

Ég er hrifin af hugmyndinni um skráargatið vegna þess að það hjálpar okkur að velja hollustu vöruna hverju sinni. Við búum við það að lífsstílstengdir sjúkdómar eru að aukast, offita er orðin faraldur á heimsvísu. Það eru ekki bara Íslendingar sem fitna og fitna. Okkur ber að reyna að vinna gegn því eins og hægt er. Það er mjög tímafrekt fyrir fólk að lesa vel á umbúðir þó að það sé í raun nauðsynlegt og fólk ætti að reyna að gera það. Það krefst hins vegar ákveðinnar sérþekkingar. Það eru t.d. til ótal orð yfir sykur, mismunandi sykur. Það er mjög erfitt fyrir fólk að átta sig á sykurmagni í matvörum því að innihaldslýsingin gefur ekki endilega upplýsingar um magn og ef það eru fjórar til fimm gerðir af sykri í vörunni heita þær hver sínu nafni og fólki sýnist sykurmagnið kannski ekki vera svo mikið. En allur þessi sykur kæmist aldrei í gegnum skráargatið. Þess vegna ættum við að taka það upp við fyrsta tækifæri.

Flokkar: Óflokkað

«
»

Facebook ummæli

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli.
Tilkynna má óviðeigandi ummæli í netfangið ritstjorn@eyjan.is

Eyjan Media ehf. - Kringlunni 4-12, Reykjavík - eyjan(hjá)eyjan.is