Fimmtudagur 3.11.2016 - 12:12 - 2 ummæli

Samfylkingin getur átt framtíð!

Samfylkingin getur átt framtíð.  Oddný Harðardóttir veitti flokknum þá framtíð með þvi að segja af sér. Við tekur nýr maður í landsmálapólitík sem hefur getið sér gott orð í bæjarpólitíkinni á Akureyri. Hann er ekki skaðaður af launsátursvígum, meintum svikum vegna hrunsins og öðrum fortíðarvandamálum Samfylkingarinnar.

Ég vona að efnilegur, nýr leiðtogi Samfylkingarinnar nái að rétta úr kútnum. En ef ekki þá deyr Samfykingin drottni sínum í næstu kosningum. Þá verður bara að hafa það. Það eru fleiri sem geta tekið upp kyndlinn í anda norræns sósíaldemókratisma.

Flokkar: Óflokkað

Mánudagur 31.10.2016 - 15:11 - 5 ummæli

Framsókn klofin í herðar niður (eða flísast úr Framsókn?)

Klofningurinn í Framsóknarflokknum er algjör. Það er að koma í ljós eftir kosningar þar sem Sigmundur Davíð hervæðist í fjölmiðlum. Stuðningsmenn hans margir hafa verið afar harðorðir á samfélagsmiðlunum. Þoldu algerlega ekki að tapa á flokksþingi. Vigdís Hauksdóttir gerir nú opinberlega atlögu beint að kjörnum formanni Sigurði Inga.

Sigurður Ingi mun standa þessa atlögu að sér ef hann vill. Og hann er með þétt lið að baki sér. En þingflokksfundir Framsóknar verða ekki mikils virði eftir það.

Annað hvort mun Framsóknarflokkurinn klofna endanlega eða þá að þessir tveir herramenn verða að yfirgefa sviðið.

Ef það verður niðurstaðan þá liggur lausnin fyrir. Lilja Dögg Alfreðsdóttir tekur við sem formaður og Silja Dögg Gunnarsdóttir tekur við sem varaformaður. Ritari verður áfram Jón Björn Hákonarson.

Þessi klofningur þarf hins vegar ekki að koma í veg fyrir að Framsóknarflokkurinn taki þátt í ríkisstjórn með Sjálfstæðisflokki, Bjartri framtíð og Viðreisn. Þvert á móti. Fyrir hina flokkana er pólitískt auðveldara gagnvart kjósendum að fá með klofinn Framsóknarflokk án Sigmundar Davíðs en „heilan“ Framsóknarflokk með  SDG innanborðs.

… og meirihlutinn er nægur til að gefa svigrúm fyrir þingmenn til að sitja hjá í málum sem þeir eru ekki alveg sáttir við!

Viðbót:

Hef strax fengið nokkur viðbrögð við þessum pistli þar sem menn staðhæfa að „Klofningur í Framsókn“ sé ofmælt. Sigmundur Davíð standi nú nánast einn. Ég ofmeti styrk hans. Ef það er rétt ætti fyrirsögnin að vera „Flísast úr Framsókn“

Flokkar: Óflokkað

Fimmtudagur 29.9.2016 - 18:22 - 5 ummæli

Um ósanngirni og traust

„Traust milli al­menn­ings og kjör­inna full­trúa er grunn­for­senda far­sæll­ar stjórn­un­ar. Þegar traustið hverf­ur eða lask­ast, eykst tor­tryggn­in, auk­in tor­tryggni leiðir til auk­ins óróa,“ segir Sigurður Ingi Jóhannsson í færslu á samfélagsmiðli þar sem hann leitast við að skýra hvers vegna hann tók þá erfiðu ákvörðun að bjóða sig fram gegn Sigmundi Davíð Gunnlaugssyni formanni Framsóknarflokksins.  Lengst af sterkum, farsælum og óumdeildum formanni sem á undanförnum mánuðum hefur setið undir harðri gagnrýni og ásökunum vegna mistaka sinna, ásökunum sem að oft á tíðum hafa verið ósanngjarnar og gengið allt of langt.
Því miður skiptir ekki öllu máli af hverju traust laskast. Þegar það hverfur þá hverfur það. Það getur þess vegna verið vegna misskilnings eða rangfærslna. Það er bara svo helvíti erfitt að fá það til baka.
Það er vandinn sem Sigmundur Davíð stendur frammi fyrir. Hver raunverulegur sannleikur er skiptir bara ekki lengur máli hjá almenningi. Traustið er farið hjá þeim kjósendum sem ekki eru því harðari Framsóknarmenn. Sem standa yfirleitt með sinni forystu fram í rauðan dauðann og ekki síst þegar þeim finnst ósanngjarnt að þeim vegið. Og ég veit að það hefur að sumu leiti verið ósanngjarnlega að Önnu Stellu og Sigmundi Davíð vegið.
Hef reyndar setið undir ámælum fyrir að taka upp hanskann fyrir þau þegar árásirnar hafa gengið yfir allan þjófabálk.
Sigmundur Davíð getur fengið óskorað traust meirihuta flokksþings Framsóknarmanna. En því miður fyrir hann er hætt við að hann nái ekki aftur töpuðu trausti almennings. Frekar en aðrir sterkir leiðtogar sem gegnum aldirnar víða um heim hafa upplifað. Hversu ósanngjarnt sem það kann að vera í hugum margra.
Og með töpuðu traustu almennings er Sigmundur Davíð ekki fýsilegur kostur fyrir aðra flokka í stjórnarsamstarf. Hversu góðan stuðning hann hefur innan eigin flokks.
Sem betur fer sagði ég mig úr Framsóknarflokknum 1.desember 2010. Ég hefði ekki viljað þurfa að standa frammi fyrir því vali sem flokksþingsfulltrúar Framsóknarflokksins standa frammi fyrir um helgina.
Annars vegar að fylkja sér á bak við Sigmund Davíð, formanninn sem náð hefur góðum árangri en missteig sig. Gerði vissulega afar afdrifarík mistök með því að segja ekki frá eignarhaldi konu sinnar á aflandsfélagi erlendis og væntanlega mistökum í skráningu á eignarhaldi félagsins þar sem hann var mögulega fyrir mistök skráður eigandi helmingshluts þess félags. Þá skipir engu að sú skráning hafi verið leiðrétt síðar.  Þau mistök í skráningu skipta því miður fyrir Sigmund Davíð engu í hugum almennings sem tapað hefur traustinu.
Hins vegar góðum og gegnum Framsóknarmanni af gamla skólanum sem hefur staðið sig með ótrúlegum sóma við afar erfiðar aðstæður og hefur náð að byggja upp traust í sinn garð hjá samstarfsflokknum, stjórnarandstöðunni og almenningi. Það hefur örugglega ekki verið auðvelt fyrir Sigurð Inga að standa upp og bjóða sig gegn sitjandi formanni. Og hann gerir það ekki af eigin frumkvæði heldur vegna mikils þrýstings fjölmargra Framsóknarmanna sem óttast einangrun flokksins.
Hið erfiða val sem flokksþing Framsóknarflokksins stendur frammi fyrir er það hvort standa skuli að baki formanns sem mögulega er fórnarlamb ósanngjarnra aðstæðna og árása og sýna almenningi að flokkurinn stendur að baki formanni sínum þegar að honum er vegið að þeirra mati.
Eða að velja rótgróinn Framsóknarmann sem tók við stýrinu í ríkisstjórn þegar ágjöfin hafði laskað formanninn um of, varaformanninn sem stýrði skútunni í vör og ávann sér með því traust stórs hluta samflokksmanna sinna, samstarfsmanna úr öðrum flokkum og almennings.
Ef kalt er litið á málið þá stendur val flokksþings Framsóknarflokksins milli klárrar stjórnarandstöðu og mögulegrar einangrunar – sem vissulega getur gefið sóknarfæri til lengri tíma – annars vegar og mögulegrar ríkisstjórnarþátttöku og að minnsta kosti þokkalegum samstarfsgrunni flokksins við aðra flokka á Alþingi á komandi kjörtímabili hins vegar.
Valið er ekki mitt. Sem betur fer. Valið er flokkþings Framsóknarflokksins.

Flokkar: Óflokkað

Miðvikudagur 20.7.2016 - 15:14 - Rita ummæli

Lýðræði og mannréttindi í hættu!

Lýðræðið er ekki sjálfgefið. Grundvallarmannréttindi eru ekki sjálfgefin. Þvert á móti.

Við vitum hvernig einræðisherrar og herforingjaræði var við stjórn fjölda ríkja í Evrópu lungann úr síðustu öld. Fasistar, nasistar og einræðisherrar sem stjórnuðu í nafni kommúnisma.

Sovétríkin með Stalín, Þriðja ríki Þýskalands með Hitler, Ítalía með Mussolini, Spánn með Franco, Portúgal með Salazar, Grikkland með Kondylis, Metaxa og síðar Ioannidis, Pólland millistríðsáranna með Pilsudski og síðar einræðisherrar og leppar Sovétríkjanna, Rúmenía með fasistan Antonescu og síðar leppar Sovétsins og að lokum Ceaușescu. Og svo náttúrlega öll hin löndin á áhrifasvæði Sovétríkjanna eftir síðari heimsstyrjöldina. Balkanskaginn eftir daga Títós.

Það er unnt að telja fleiri!

Og ef við snúum okkur til Rómönsku Ameríku þá voru herforingjastjórnir og einræðisherrar frekar regla en undantekning á 20. öld.

Nú erum við að horfa aftur á sömu þróun.

Erdogan í Tyrklandi.

Við sjáum tilhneygingu í þessa átt í Ungverjalandi og Póllandi sem dæmi.

Pútín er eins og hann er í Rússlandi. Hvíta-Rússland og Úkraína þar sem öfgafullir þjóðernissinnar hafa sett allt í bál og brand.

Það sem verra er.

Bandaríkin með fasistan Trump sem mögulegan forseta.

Lýðræðið og mannréttindin eru ekki sjálfgefin. Og við þurfum að búa okkur undir að verja bæði lýðræðið og mannréttindin.

Flokkar: Óflokkað

Fimmtudagur 7.7.2016 - 13:53 - 2 ummæli

Samvinnurekstur um heilsugæslu

Sumir eru að fara af saumunum vegna einkarekinna heilsugæslustöðva í Reykjavík. En opinber rekstur í heilbrigðismálum er ekki endilega besta formið í öllum tilfellum. Samvinnurekstrarformið gæti hentað vel um rekstur heilsugæslustöðva. Vandinn er bara sá að löggjafinn hefir markvisst unnið gegn samvinnurekstrarforminu sem mjög oft gæti átt við.

… og áður en þið sem sjáið rautt þegar minnst er á samvinnurekstur farið að missa ykkur í athugasemdakerfinu þá verð ég að minna ykkur á að samvinnurekstrarformið er eitt. SÍS annað …

Flokkar: Óflokkað

Laugardagur 4.6.2016 - 18:08 - Rita ummæli

Oddný er sigur Viðreisnar!

Oddný Harðardóttir hafði sigur í formannskjöri Samfylkingarinnar. Sá sigur er einnig sigur Viðreisnar og einnig sigur VG. En ósigur Samfylkingarinnar sem stjórnmálaafls en sigur fyrir hugmyndafræði vinstri hluta þeirra ágætu stjórnmálasamtaka!

Ég held við stöndum frammi fyrir nýjum veruleika í íslenskum stjórnmálum með þessari niðurstöðu. Vinstrið styrkist. Og hægri miðjan styrkist. Og Oddný er Auðhumla Viðreisnar!

Það að Samfylkingin hafi valið til vinstri í þessu formannskjöri gerir að að verkum að afar stór hópur hægri krata mun ekki kjósa þau samtök. Þeir munu margir kjósa Viðreisn.

Sigríður Ingibjörg sá um Hara Kiri Samfylkingarinnar með rýtingsstungu í bak fráfarandi formanns Samfylkingarinnar Árna Páls Árnasonar. Hara Kirir sem breytti Samfylkingunni frá mikilvægu pólitísku afli yfir í smáflokk. En kannske gerði Sigríður Brútus það sem gera þurfti! Draga línuna milli vinstrisins og hinnar hófsömu miðju Árna Páls. Lagði grunn fyrir aðskilnaði bins mikilvæga tiltölulega hófsömu vinstris Kötu Jak og hægri kratismans. Allavega þá hafa hægri kratar ekkert lengur neitt sameiginlegt með Samfó.

Og þar liggur sóknarfæri Viðreisnar!

„I told you so“ er soldið klént 🙂  En „I told you so“ er barasta að gerast. Ég byrjaði að spá uppstokkun íslenskra „stéttar“ stjórnmála fyrir áratug eða svo. Og enn einu sinni þá sé ég spádóma mína rætast…  

 

 

Flokkar: Óflokkað

Þriðjudagur 15.3.2016 - 17:51 - 6 ummæli

Vandræða úthverfið „101 Reykjavík“

Hér á árum áður var Breiðholtið úthverfi. Og í hugum margra „vandræðaúthverfi“. En nú er Breiðholtið löngu hætt að vera úthverfi. Og fjarri því að vera til vandræða. Breiðholtið með Fossvoginum, Smáíbúðahverfinu og Háaleitishverfinu með Kringlumýrina er orðin virk miðja á höfuðborgarsvæðinu.

En hvar liggja úthverfin?

Jú, erfiðustu úthverfin í öllum skilningi eru í póstnúmerum 101 og 107. Afskorin jaðarbyggð.

Á sama hátt og til dæmis hinn ágæti sjávarbær Siglufjörður sem fyrir 100 árum var í alfaraleið og miðju samgangna þar sem samgöngur á Íslandi á þeim tíma voru einungis greiðar á sjó hætti að vera í alfaraleið og bærinn varð skemmtilegur útkjálki með mikla sögu, þá eru póstnúmer 101 og 107 í Reykjavík orðinn útkjálki Reykjavíkur. Með mikla sögu.  Og niðurgreidd störf gegnum stjórnýslu landsins sem var flutt frá Kaupmannahöfn upp úr aldamótunum 1900 og komst aldrei til fólksins.

Vandræðaúthverfið 101 er hins vegar – ólíkt Siglufirði – með þá stöðu að það eru svo margir stjórnmálamenn og áhrifamenn úr atvinnulífinnu sem námu í tveimur ágætum framhaldsskólum, MR og Verzló, fastir í fortíðinni og gera allt til þess að viðhalda „fyrri stöðu“ þessa erfiða úthverfis í stað þess aðhorfa til heildarinnar. Heildarinnar á höfuðborgarsvæðinu og heildarinnar á Íslandi yfir höfuð.

Þessi fortíðarárátta sem jafna má við rómantíska sýn Íslendinga á síðari hluta 19. aldar og fyrri hluta 20. aldar um íslenska „þjóðveldið“ á Þjóðveldisöld, er löngu farin að vera hamlandi fyrir eðlilega þróun bæði höfuðborgarsvæðisins og landsins í heild.

Hvernig væri að ráðamenn í stjórn og stjórnarandstöðu sem aldir eru upp í MR, Verzló og lagadeild HÍ taki hausinn upp úr hlandkoppunum og fari að hugsa um heildina Ísland?

Flokkar: Óflokkað

Föstudagur 11.3.2016 - 23:43 - 3 ummæli

Framsókn hætt sem flugvallarvinur?

Sigmundur Davíð Gunnlaugsson formaður Framsóknarflokksins hefur nú bent á hið augljósa. Uppbygging framtíðar Landspítala við innilokaða Hringbraut er bull.  Það á að sjálfsögðu að byggja upp sjúkrahús allra landsmanna frá grunni á nýjum hentugum stað. Það er einfaldasta ig fljótlegasta leiðin. Það hefur verið ljóst um áratuga skeið.

Hringbrautin og Borgarspítalinn – þar sem hefði átt að byggja upp þjóðarsjúkrahús á sínum tíma en kosturinn markvisst eyðilagður með byggingu íbúðahúsnæðis vestan Eyrarlands – geta verið í fullum rekstri þar til flutt er inn í glænýjan nútíma spítala. Hugmyndin um uppbyggingu við Hringbraut er eins og að byggja upp alla kaffihúsamenningu á Kaffi Mokka …

En með hugmyndinni um að byggja framtíðar þjóðarsjúkrahús við Vífilstaði – er forsætisráðherrann ekki að slá nagla í líkkistu Reykjavíkurflugvallar?

Með flutningi þjóðarsjúkrahússins er miklu fljótlegra að flytja bráðasjúkinga sem koma með sjúkraflugi utan af landi frá Keflavík með hagkvæmri þyrlu en að potast í gamaldags sjúkrabíl gegnum föstudagsumferðina úr Vatnsmýrinni í jaðar Heiðmerkur…

Hvað segja „flugvallarvinir“ við þessu?

Flokkar: Óflokkað

Miðvikudagur 24.2.2016 - 21:00 - 3 ummæli

Spor Pírata ekki bara í sandinn…

Spor Pírata í íslenskum stjórnmálum eru ekki einungis spor í sandinn sem munu mást út í næsta flóði.  Þeir hafa þegar sett spor í stefnu og hugsun annarra flokka. Spor sem munu standa næstu árin. Þá skiptir engu hvernig óhjákvæmileg núverandi átök innan Píratapartýsins munu enda.

Það sem er svo spennandi við stöðu Pírata nú er hvernig þeir munu takast á við alvöruna og ábyrgðina. Píratar eru ekkert öðruvísi en annað fólk. Þess vegna er sú staða sem þau eru í núna nánast fyrirsjáanleg. Og það er gott fyrir Pírata að hún kemur upp núna því það gefur þeim tíma til að ganga í gegnum þetta þroskaskeið í tíma fyrir næstu kosningar. Því þetta er hluti af hefðbundnu þroskaferli hóps. Ef þau klára sig af þessu á skynsaman hátt ÞÁ erum við að horfa á öflugt framtíðarafl í íslenskum stjórnmálum. Ef ekki – þá er þetta einungis enn ein tilraunin til breytinga.

En „bottomlæn“ verður alltaf að Píratar hafi verið VERULEGA spennandi tilraun. Og lærdómurinn af henni mun hafa áhrif í þróun stjórnmála til framtíðar.

Ég efast um að fólk almennt skilji hvaða áhrif Píratar hafa haft á aðra stjórnmálaflokka og dálítið breytt þeim vonandi til hins betra. Píratar hafa þegar markað spor sem ekki verða útmáð. Mögulega mun byltingin éta börnin sín en áhrif byltingarinnar mun gæta til framtíðar. Þannig að þótt Píratasjoppunni yrði lokað hér og nú þá myndu þau sem að henni hafa komið verið stolt af sínu verki…

… en ég held og vona að Píratar náð fótfestu á ný eftir nauðsynlegt þroskaferli.

Flokkar: Óflokkað

Föstudagur 12.2.2016 - 08:15 - 3 ummæli

Leiðtoginn Árni Páll Árnason

Á augabragði er Árni Páll Árnason orðinn sterkur leiðtogi Samfylkingarinnar.  Vopn andstæðinga hans innan Samfylkingarinnar hafa snúist í höndum þeirra.  Þeir hafa áður lyft kutann á loft nánast úr launsátri en Árni Páll stóð þá árás af sér af naumindum.

Í þetta skiptið tók leiðtoginn Árni Páll Árnason af skarið með því að draga fram í dagsljósið þá drauga sem Samfylkingin og Árni Páll hafa þurft að kljást við frá Jóhönnutimanum og kvað þá niður. Nú er ekki aftur snúið. Samfylkingin og stuðningsmenn hennar verða að ræða mistök fortíðar, gera fortíðina upp. Viðurkenna mistök sín fyrir þjóðinni, en jafnframt standa með stolti á grunni þess jákvæða sem Samfylkingin hefur náð fram í íslensku samfélagi.

Árni Páll sem fram að þessu hefur ekki náð að hrista af sér drauga fortíðar. Drauga sem voru honum til trafala í Alþingiskosningunum þar sem fugfjaðrirnar voru nánast klipptar af honum.  Árni Páll þurfti að heyja orrustu sem formaður í ríkisstjórnarflokki þar sem fráfarandi formaður stýrði sökkvandi skipi í strand í stað þess að láta hinum nýja formanni eftir stjórnvölinn.

Árni Páll hefur nú af auðmýkt hrist af sér þessa fortíðardrauga með opinskáu bréfi til flokksmanna sinna og tekið skref til framtíðar sem sýnir að hann hefur það sem þarf til þess að leiða stjórnmálaflokk upp úr öldudalnum.

Nú er valið flokksmanna hans. Ætla þeir að standa að baki þeim sem frá upphafi hafa gert sitt til að leggja stein í götu formannsins vegna þess að Samfylkingarfólk valdi „rangan“ formannsframbjóðanda í fjölmennri, lýðræðislegri kosningu og reynt a nýta sér tæknilega glufu í lagaverki flokksins til að koma formanninum frá.  Eða ætla þeir að standa að baki leiðtoganum sem nú hefur stigið fram og sýnt að hann er öflugur leiðtogi sem hefur og getur breytt samræðu Samfylkingarinnar við fólkið í landinu og þannig komið Samfylkingunni á réttan kjöl.

Framtíð tilraunarinnar Samfylkinginn er undir. Á 100 ára árstíð Alþýðuflokks Íslands …

Flokkar: Óflokkað

Eyjan Media ehf. - Kringlunni 4-12, Reykjavík - eyjan(hjá)eyjan.is