Laugardagur 20.1.2018 - 16:41 - Rita ummæli

Veggjaldagöng á höfuðborgarsvæðið!

Þótt hin ágæta Borgarlína geti gert sumum lífið léttara þá fer því fjarri að hún leysi samgönguvanda höfuðborgarsvæðisins. Óskhyggja sumra um endalok einkabílsins gengur ekki upp og mögulegar sjálfakandi bifreiðar framtíðarinnar þurfa að komast milli staða. Heimskulegar hugmyndir um lækkun umferðahraða á Hringbraut bæta ekki stöðuna þótt þær færu í gegn. Enda umferðateppurnar næg hraðahindrun á álagstímum.

Það þarf úrbætur sem stuðla að sæmilega þokkalegu flæði umferðar á höfuborgarsvæðinu. Lausnir að þeim úrbótum liggja fyrir. Öskjuhlíðargöng, Kópavogsgöng, Sundabraut, Skerjafjarðarbraut og jafnvel Holtsbraut undir Skólavörðuholtið!

Auðvitað á að fara í allar þessar framkvæmdir í sæmilega vitrænni röð. Og auðvitað á að fjármagna stóran hluta þeirra með veggjöldum! Því það eru aðrar leiðir til staðar til að komast hjá veggjöldum fyrir þá sem það kjósa. En þeir sem kjósa þessar leiðir greiða eðlilegt gjald fyrir það.

Ekki gleyma að þessar samgöngubætur gagnast ekki einungis hefðbundnum einkabíl, heldur einnig almenningssamgöngum og sjálfkeyrandi drossíum.

Ekki heldur gleyma því að ef horft er til umhverfissjónarmiða þá yrðu slíkar framkvæmdir umhverfisvænar þar sem vegalengdir styttast. Auk þess sem þróun borgarbílsins mun öruggleg leiða til hverfandi umhverfisáhrifa. Við getum bara skoðað þróun undanfarinna 10 ára þar sem brennsla mengandi orkugjafa nútímabílsins er brot af sambærilegum bílum síðasta áratugar auk þess sem hlutur rafmagnsbíla og annarra umhverfisvænni bifreiða hefur stóraukist og mun aukast.

Því það verða ekki almenningssamgöngurnar – eins ágætar og þær geta verið – sem bjarga loftlagsmálunum. Heldur tæknibreytingar á fararskjótum fjölskyldunnar og tilkoma sjálfakandi „leigubifreiða“.

Og aftur að því sem skiptir máli.

Fyrir Reykjavíkursvæðið þá eru samgöngubætur lífsspursmál. Fyrir almenningssamgöngur, umhverfisvæna fjölskyldubíla og sjálfakandi „samfélagsbíla“ sem til dæmis sækja í einu nokkrar hjúkkur á Lansanum sem búa nálægt hvor annarri heim til að koma þeim í vinnuna.

Leiðin er ekki flókin. Veggjaldagöng innan höfuðborgarsvæðisins sem stórbæta samgöngur og þar sem val er um aðrar leiðir til að komast milli staða.

 

 

 

Flokkar: Óflokkað

Miðvikudagur 6.12.2017 - 20:48 - 2 ummæli

Jerúsalem höfuðborg Palestínu og Ísraels!

Jerúsalem á að sjálfsögðu að vera höfuðborg Palestínu og Ísraels! Tveggja sjálfstæðra ríkja. Nú hefur forseti Bandaríkjanna ákveðið að viðurkenna Jerúsalem sem höfuðborg Ísraels. Sem væri í lagi ef hann hefði jafnframt viðurkennt Jerúsalem höfuðborg sjálfstæðs ríkis Palestínu.

Í þessari stöðu getur Ísland haft mikilvægt hlutverk. Viðurkennt Jerúsalem sem höfuðborg Palestínu og Ísraels.

Flokkar: Óflokkað

Þriðjudagur 17.10.2017 - 08:43 - 2 ummæli

Ögurstund tjáningarfrelsisins

Það er enn ein ögurstund tjáningarfrelsisins á Íslandi sem ítrekað er reynt að traðka á. Það er háalvarlegt þegar framkvæmdavaldið beitir valdheimildum sínum gegn ákvæðum stjórnarskrá eins og nú hefur enn einu sinni gerst. Það versta er að nú dugir ekki að dómsvaldið taki fram fyrir valdníðslu framkvæmdavaldsins.  Tímaþátturinn gerir það að verkum.

Það þarf að vera unnt að áfrýja valdníðslu eins og þessari strax. Svipað og þegar óskað er eftir gæsluvarðhaldi.

Stundin stendur nú í ströngu og ekki gefið að fjölmiðillinn hafi fjárhagslegt bolmagn til að standa í dýrum málaferlum við auðvaldið og þjóna þess innan framvæmdavaldsins.

Almenningur þarf að tryggja að Stundin – sem ég hef ekkert sérstakt dálæti á svosem – geti takið til varna án þess að hafa áhyggjur af fjármögnun. Carolina Fund hefur verið nýtt í verri málefna en það.

Flokkar: Óflokkað

Miðvikudagur 11.10.2017 - 08:03 - Rita ummæli

Sr. Þórir og kirkjugarðurinn

Sr. Þórir Stephensen fyrrum dómkirkjuprestur berst nú fyrir því að hinn gamli Víkurkirkjugarður og nú kuml við Landsímareit verði vernduð í stað þess að byggja þar hótel. Ég er styð Sr. Þóri heils hugar í þessari baráttu.

Flokkar: Óflokkað

Miðvikudagur 27.9.2017 - 17:37 - 4 ummæli

Sendu mér „bliku“

Orðskrípið „selfí“ fer dulítið í taugarnar á mér. Ef vilji væri fyrir hendi ætti að vera unnt að finna gott íslenskt orð yfir fyrirbærið líkt og við fundum „sími“, „þyrla“, „þota“ og svo framvegis.

„Selfí“ er augnabliks sjálfsmynd af einstaklingi yfirleitt tekinn á myndavél í snjallsíma sem viðkomandi ákveður yfirleitt að dreifa á einhverjum samfélagsmiðlanna.  (Sjáið hvað við erum komin með fínorð um „smartphone“ og „social media“!)

Af hverju ekki að nota orðið „blika“ yfir fyrirbærið. Orð sem dregið er af „blik“ í „augnablik“?

Flokkar: Óflokkað

Fimmtudagur 1.6.2017 - 14:26 - 8 ummæli

Mistök að hafna ESB

Við værum betur sett innan ESB og með evruna sem gjaldmiðil. Í dag og næstu árin. Værum að móta nýja, líklega betri Evrópu. En þess í stað erum við jaðarsett smáþjóð sem mögulega þarf að biðla til einangrunarsinna í Bandaríkjunum sem við vitum ekkert hvort unnt er að treysta á, hnignandi Breta sem eru að missa elstu og öflugustu fjármálamiðstöð heimsins til Frankfurt, mögulega Norðmanna sem sviku okkur í hruninu og þurfum að nálgast Evrópusambandið á hnjánum.

Oflæti okkar vegna tímabundins uppgangs og velgengni hefur fyrir löngu stigið okkur til höfuðs.

Það hefði verið betur ef við hefðum klárað aðildarviðræðurnar á sínum tima og tekið ákvörðun um inngöngu eða inngöngu ekki í ESB á grunni þjóðaratkvæðagreiðslu. Þá værum við annað hvort með fína stöðu innan ESB eða í núverandi tímabundinni sæmilegri stöðu utan ESB – en á grunni vilja þjóðarinnar í þjóðaratkvæðagreiðslu. Ekki á forsendum forsjárhyggjustjórnmálamanna.

Við erum nú í sæmilegri stöðu sem er bara tímabundin og mun breytast fyrr eða síðar.

… og mögulega merjumst við á milli Bandaríkjanna og Evrópu og Bretlands og ESB …

Innan fárra ára munu margir væntanlega naga sig í handarbökin …

Flokkar: Óflokkað

Föstudagur 24.2.2017 - 18:51 - Rita ummæli

Alþingismenn vinna vinnuna sína

Alþingismenn vinna vinnuna sína samviskusamlega og sómasamlega. Leggja oft nótt við dag til að standa sig og eiga það allt of oft til að vanrækja fjölskyldu sína vegna þess að „mikilvægi alþingismaðurinn“ kemur fyrst. Svo fjölskyldan og lífið. Þannig hefur það verið þá áratugi sem ég hef fylgst með Alþingi og alþingismönnum.

Núverandi Alþingi er engin undantekning á því. Það ágæta fólk er hvorki betra né verra en það fólk sem kosið hefur verið á Aþingi í lýðræðislegum kosningum á Íslandi hingað til. Kannske svolítið öðruvísi sumt – enda samfélagið öðruvísi en áður.

Ástæða þess að ég vek athygli á þessu núna er að enn einu sinni er söngurinn um „óhæft Alþingi“ og „óhæfa alþingismenn“ að hefjast.

Það er eitt að vera málefnalega ósammála ágætu fólki á Alþingi. Annað að rakka það niður og saka það um að það „vinni ekki vinnuna sína“ og „sé óhæft.“

Að sjálfsögðu er einn og einn í 63 manna hópi ekki að skila sínu allan ársins hring en oftast vel þegar uppi er staðið!

Einhver kannske bara latur. Sem er vont. Ætti þá að sína sóma sinn í að finna sér annað starf. En latir einstaklingar finnast í flestum 63 manna fyrirtækjum.

Annar þunglyndur og því á tímabilum ekki að skila fullum afköstum.  Einn núverandi þingmaður tók sér veikindaleyfi af þeim sökum og gerði líklega meira með því fyrir þá fjölmörgu hæfileikaríku Íslendinga sem eiga við sama erfiða verkefni að glíma en löggjafinn hefur gert lengi!  Hefur með því líklega styrkt stöðu fólks í sömu stöðu úti í atvinnulífinu. Því oftast er einhver á 63 manna vinnustað haldinn þunglyndi sem á tímabilum getur komið niður á vinnu viðkomandi. Sem segir ekkert um heildarvinnuframlag viðkomandi.

Ég hef þekkt og þekki fleiri tugi núverand og fyrrverandi alþingismanna í öllum flokkum. Það sem hefur einkennt flest það fólk er dugnaður, viljinn til að hjálpa fólki, áhugi fyrir því að koma góðu til leiðar og gera samfélagið betra út frá sinni pólitísku sýn. Um sýnina getum við verið ósammála, en viljinn og dugnaðurinn hverfur ekki fyrir það!

Frábið mér því lítt rökstutt og ósanngjarnt væl pirraðra samfélagsmiðlatrölla sem vilja slá sig til riddara með ómaklegum árásum á oftast duglega og vel meinandi alþingismenn. Bið samfélagsmiðlatröllin að gagnrýna okkar kjörnu fulltrúa út frá málefnum en ekki beita skítkasti og bulli. Slík gagnrýni getur skilað sér í betri ákvörðunum og betra samfélagi. Skítkast og bull skaðar okkur öll.

Flokkar: Óflokkað

Miðvikudagur 11.1.2017 - 16:08 - 2 ummæli

Rosmhvalanes, Garðar og Kjalarnes

Það sem vantar í nýjum stjórnarsáttmála er meðal annars stefna um framtíðarskipan sveitarfélaga.  Þar ætti fyrsta skrefið að vera sameining sveitarfélaga á höfuðborgarsvæðinu.  Því þegar nýskipan og nauðsynleg sameining sveitarfélaga á suðvesturhorni Íslands hefur gengið í gegn er einfaldara að ganga í alvöru sameiningar sveitarfélaga annars staðar á landinu.

Og auðvitað á samhliða að bæta við verkefni sveitarfélaganna á sama tíma og tekjustofnar þeirra verði víkkaðir og styrktir. Skatttekjur eiga að renna til sveitarfélaganna sem fjármagna skylduverkefni sín en greiði „útsvar“ til ríkisins til að standa undir sameiginlegum rekstri Íslands. Ekki núverandi skipan sem Reykjavíkurvaldið deilir og drottnar.

Það eiga einungis að vera 3 sveitarfélög áhöfuðborgarsvæðinu.

  • „Kjalarnes“ sem standi saman af Akranesi, Hvalfjarðarhreppi, Mosfellsbæ, Reykjavík og Seltjarnarnesi.
  • „Garðar“ sem standi saman af Kópavogi, Garðarbær, Hafnarfirði, Vatnsleysuströnd og Grindavík.
  • „Rosmhvalanes“ sem standi saman af Vogum, Reykjanesbæ, Garði og Sandgerði.

Meira um útfærslu stjórnsýslu slíkra sveitarfélaga þar sem tekið verði í auknum mæli upp beint lýðræði, aukinni sjálfstjórn í hverfum og öflugum sveitarstjórnum kemur síðar!

 

 

Flokkar: Óflokkað

Mánudagur 5.12.2016 - 11:33 - 3 ummæli

Gamall draumur um réttlátt þjóðfélag

Það er verið að reyna að mynda ríkisstjórn.  Fyrir nær hálfri öld kom fram á hinum pólitíska vettvangi markmiðsyfirlýsing í fjórtán liðum um uppbyggingu íslensks þjóðfélags. Sú markmiðssetning hefur alla tíð sett mark sitt á mína sýn á þjóðfélagið. Ég gæti enn í dag skrifað undir meginefni allra fjórtán greinanna.

Þessi stefnuyfirlýsing á ekki síður við í dag en fyrir fjórum áratugum síðan. Legg til að stefnuyfirlýsingin verði lögð til grundvallar hjá nýrri ríkisstjórn. Hver sem hún kann að verða.

En markmiðið var að skapa:

1. Þjóðfélag, þar sem jöfnuður og mannleg samhjálp sitja í öndvegi

2. Þjóðfélag, sem tryggir sókn þjóðarinnar til æ fullkomnara og virkara lýðræðis, aukinnar menningar og andlegs sem líkamlegs heilbrigðis allra þegna þjóðfélagsins.

3. Þjóðfélag, þar sem hver einstaklingur getur valið sér eigið lífsform og þroskað hæfileika sína við skilyrði stjórnmálalegs, efnalegs og andlegs frelsis.

4. Þjóðfélag, sem tryggir öllum frelsi frá ótta, skorti og hvers konar efnalegum þvingunum, mismunun og þjóðfélagslegu óréttlæti og hefur réttaröryggi og afkomuöryggi að leiðarljósi.

5. Þjóðfélag, þar sem allir hafa jafnan rétt til menntunar og jafnan möguleika á að njóta allra menningarlegra gæða, sem þjóðfélagið skapar.

6. Þjóðfélag, sem styður að heilbrigðu lífsgæðamati og setur manngildið í öndvegi, en hafnar því gildismati fjármagns og peningavalds, sem þjóðfélag þeirra afla skapar.

7. Þjóðfélag, sem stöðugt sækir fram til aukinnar velmegunnar með skynsamlegri stjórnun og áætlunum um hversu íslenskar auðlindir verði nýttar af mestri fyrirhyggju og atvinnulíf, sem á þeim byggir, verði þróað, án þess að vera að neinu marki byggt upp á fjárfestingu útlendinga.

8. Þjóðfélag, sem missir aldrei sjónar á verndun fegurðar og sérkenna íslenskrar náttúru og rétti allra landsmanna til að njóta þeirra, en hafna skyndigróða, sem síðar gæti spillt verðmætum, sem ekki verða til fjár metin.

9. Þjóðfélag jafnaðar, sem stefnir að útrýmingu hvers konar misréttis milli stétta og milli þegnanna eftir búsetu, en viðurkennir í reynd þjóðfélagslegt mikilvægi allra starfsgreina og jafnar því efnaleg met á milli þeirra.

10. Þjóðfélag frelsis og lýðræðis, þar sem ákvörðunarrétturinn byggir á virku lýðræði, ekki aðeins í kosningum til löggjafarþings og sveitarstjórna, heldur og í fyrirtækjum, í hagsmunasamtökum og í skólum.

11. Þjóðfélag, þar sem samfélagið í heild mótar meginstefnuna, en einstaklingarnir njóta ákvörðunarfrelsis að þeim mörkum, að þjóðarheildin bíði ekki tjón af.

12. Þjóðfélag, þar sem réttur skoðanalegs minnihluta er virtur og réttarstaða hans tryggð.

13. Þjóðfélag ábyrgra þegna, sem byggja störf sín á félagslegri samhjálp og samvinnu og stýra í raun þjóðfélagsþróuninni að þeim leiðum, en hafna annars vegar forsjá og stjórn peningavaldsins með eigingirnina að leiðarljósi, og hins vegar alráðu ríkisvaldi.

14. Þjóðfélag, sem setur metnað sinn í að verja, skapa og vernda sjálfstæða íslenska menningu og menningararfleifð, en rækir jafnframt hið mikilvæga hlutverk smáþjóðarinnar á alþjóðavettvangi og tekur heils hugar þátt í hverju því alþjóðlega samstarfi, sem stefnir að lausn þeirra miklu vandamála allra þjóða að tryggja frið í heiminum og brúa gjána, sem nú skilur ríkar þjóðir og snauðar.

Flokkar: Óflokkað

Föstudagur 4.11.2016 - 08:36 - 3 ummæli

Sögufölsun Kaupþingsstjóra

Á meðan sumir stjórnendur föllnu bankanna sitja á sakamannabekk og berjast gegn enn einni aðför saksóknara sem þegar hefur komið þeim í fangelsi, hrjúfrar einn lykilstjórnandi Kaupþings sig í nýjum hægindastól hjá verðbréfafyrirtæki og reynir að endurskrifa söguna sér í hag.

Ásgeir Jónsson hagfræðingur sem var kostaður af Kaupþingi til að reka svokallaða greiningardeild, sem stundum virtist leggja frekar áherslu á að greina stöðuna bönkunum í hag en að gera það hlutlægt og með því styrkja stöðu og verð bankanna, er kominn í hlýjuna að nýju.  Glópagullið dregur.

Ásgeir er nú í yfirstjórn Virðingar og titlaður „efnahagsráðgjafi“. Hann skrifar reglulega um hugleiðingar sínar og stundum reynir hann að verja fortíð sína. Sem er sjálfsagt mál svo fremi sem sú vörn byggi ekki á rangfærslum.

En því miður grípur hann nú til rangfærslna til að réttlæta þá blindu sem glópagullið sló á hann á sínum tíma. Í nýjum pistli segir Ásgeir:

„Það sem skipti þó mestu var að eftir að bankarnir þrír drógu sig til baka hófu samfélagsbankar landsins – íbúðalánajóður og sparisjóðirnir – stórsókn inn á fasteignalánamarkaðinn til þess að endurheimta þá markaðshlutdeild sem hafði tapast til bankanna. Saman veittu þessar samfélags-lánastofnanir gríðarlegu fjármagni til fasteignalána 2007-2008 sem nægði til þess að fóðra húsnæðisbóluna í  1-2 ár til viðbótar.  Þessi sókn skildi síðan eftir ein verstu fasteignalán í nútímasögu landsins sem skattgreiðendur þurftu síðar að súpa seyðið af og lesa má nánar um í tveimur rannsóknarskýrslum Alþingis…“

Þetta er hreinlega rangt hjá Ásgeiri.  Það voru allt að 100% ófjármögnuð fasteignalán bankakerfisins sem skattreiðendur hafa þurft að súpa seyðið af, en ekki lán Íbúðalánasjóðs sem sjaldnast náðu nema í besta falli 60%-70% af markaðsvirði íbúðarhúsnæðis vegna afar lágra hámarksfjárhæða.

Þetta veit Ásgeir þótt hann segi annað sem „efnahagsráðgjafi“ Virðingar.

Viðs skulum kryfja staðhæfingu Ásgeirs um meinta „stórsókn“ Íbúðalánasjóðs inn á fasteignamarkaðinn 2007 og 2008.  Sannleikurinn er sá að íbúðalán Íbúalánasjóðs hélst svipað frá því í ágúst 2004 þegar bankarnir komu inn á íbúðalánamarkaðinn og sprengdi hann í loft upp sem endaði með hruni og allt fram yfir hrun.  Þetta má sjá á eftirfarandi línuriti sem sýnir íbúðalána banka og Íbúðalánasjóð í íslenskum krónum:

Bankarnir dældu úr fasteignalánum og settu efnahagslífið á hvolf

Heildarfjárhæð íbúðalána ÍLS var á svipuðu róli 2004 og fram yfir hrun. Smellið á myndina til að stækka hana!

Þótt framangreind mynd virðist benda til þess að bankarnir hafi fregið sig út af íbúðalánamarkaðnum í lok árs 2007 eins og Ásgeir er að reyna að gefa í skyn og falsa þannig söguna, þá var það bara alls ekki svo. Þeir fóru bara að lána gengistryggð íbúðalán í staðin. Og ef ég mann rétt þá mælti Ásgeir með töku slíkra lána sem „óháður“ framkvæmdastjóri greiningardeildar Kaupþings.

Menn vita nú hvar gjaldeyrislánin enduðu með tilheyrandi kostnaði fyrir skattgreiðendur.
Skoðum þróun gengistryggðra lána bankakerfisins til heimila 2004 til og með 2008. Athugið að gengistryggð íbúðalán voru ekki sérgreind í gögnum bankanna fyrr en um mitt ár 2007, sama tíma og Ásgeir reynir í dag að gefa í skyn að bankarnir hafi dregið sig út af íbúðalánamarkaði. Gengistryggð lán eru gul í grafinu og greinilegt að bankarnir juku verulega slík útlán allt fram að hruni!

Gjaldeyrislán bankanna tóku við af verðtryggðum íbúðalánum þeirra á árinu 2007 og 2008. Sú innkoma ýtti aftur undir þenslu á fasteignamarkaði.

Gjaldeyrislán bankanna tóku við af verðtryggðum íbúðalánum þeirra á árinu 2007 og 2008. Sú innkoma ýtti aftur undir þenslu á fasteignamarkaði.

Það sést því hér svart á hvítu að fullyrðingar hins ágæta fræðimanns Ásgeirs Jónssonar sem eðlilega blindaðist af glópagulli bankanna á sínum tíma stenst ekki skoðun. Ég held hann ætti að læra af þeirri reynslu og ekki hætta fræðimannaheiðri sínum með vísvitandi sögufölsunum sem ætlað er að breiða yfir fyrri mistök.

Flokkar: Óflokkað

Eyjan Media ehf. - Kringlunni 4-12, Reykjavík - eyjan(hjá)eyjan.is