Miðvikudagur 06.04.2011 - 20:28 - 5 ummæli

Molar um málfar og miðla 578

Úr mbl.is (05.04.2011) „Við getum ekki staðið hér í logni og horft á höfnina okkar lokaða vegna þess að Herjólfur ristir of mikið,“ sagði Elliði Vignisson, bæjarstjóri í Vestmannaeyjum.  Molaskrifari játar, að hann hefur ekki heyrt talað um að skip risti of mikið. Aðeins  að skip  risti  djúpt. En hljóta ekki Vestmannaeyingar að vita þetta? En orðabókin segir hinsvegar að sá sem  risti ekki djúpt, vaði ekki í vitinu.

Það var nefnt í morgunþætti Rásar tvö  (05.04.2011) að  spurt hefði verið um  orðið úlfatími. Það er rétt. Það var gert á þessum stað. Ekki var  spurt um hvaða tíma  sólarhrings væri verið að tala, heldur  hvernig  orðið hefði fengið  þá merkingu að tákna  tímann   frá því að börn koma heim úr skóla þar til þau fara í háttinn. Við því kom ekkert svar.

Í þessum sama  morgunþætti var  talað um vinnuþrælkun barna. Í sjónvarpi  sjáum við í viku hverri ömurleg dæmi um  þrælkun og  svívirðilegan aðbúnað  barna  víðsvegar í veröldinni. Börn  deyja  milljónum saman úr hungri og  sjúkdómum ,sem  er auðlæknanlegir.   Í morgunþættinum var talað um  heimalærdóm og  íþróttaiðkun  íslenskra barna sem  barnaþrælkun. Hve  mikil getur firring  þjóðar orðið?  Mikil. Ótrúlega mikil. 

Í kvöldfréttum Ríkissjónvarps (05.04.2011) talaði borgarstjórinn í Reykjavík  tvisvar sinnum um að búa til event. Orðið event  er enska og þýðir atburður.  Í  febrúar árið 1848, lét bæjarfógetinn í Reykjavík festa upp svohljóðandi auglýsingu: „Íslensk tunga á best við í íslenskum kaupstað, hvað allir athugi“.  Líklega hefur borgarstjórinn í Reykjavík aldrei heyrt þetta.

Hver sem deyr í nafni Allah er píslarvætti, var  skrifaði í texta í fréttum Ríkissjónvarps (05.04.2011). Molaskrifari hefði haldið,  að hér hefði átt að nota orðið píslarvottur, en ekki píslarvætti.

Alltaf er jafn hvimleitt að heyra fréttamenn segja: … samkvæmt lögreglunni. Betra væri:  Að sögn lögreglunnar.

Molaskrifari heyrði stjórnmálamann segja  að flokkur hans  væri lausnamiðaður. Merkingarlaust rugl !

Flokkar: Óflokkað

«
»

Ummæli (5)

  • „Ekki var spurt um hvaða tíma sólarhrings væri verið að tala, heldur hvernig orðið hefði fengið þá merkingu að tákna tímann frá því að börn koma heim úr skóla þar til þau fara í háttinn.“ Hvar spyrðu þessarar spurningar? Og hvar kemur þessi merking fram? Ekki í sænsku skilgreiningunni sem þú vitnaðir í, svo mikið er víst.

  • Hm. Ég virðist hafa hlaupið á mig. Las textann aftur og komst að því að ég hef verið svo heillaður af sænsku skilgreiningunni að forleikurinn hefur alveg farið framhjá mér. Biðst velvirðingar á þessu frumhlaupi mínu, verst að geta ekki eytt eigin athugasemdum á þessum vettvangi.

  • Jóhanna

    Úlfatíminn varir frá þeirri stundu sem börn og fullorðnir koma heim úr vinnu og skóla og þangað til börnin eru sofnuð. Nafngiftin er dregin af því að á þessum tíma eru fjölskyldumeðlimir eins og úlfahópur að berjast um athygli hvers annars.

    http://www.reykjanesbaer.is/upload/files/Gylfi_Ufat%C3%ADminn.html

  • Skítlegt eðli

    Vestmannaeyingar vilja ekki að bæjarstjórinn risti djúpt.

  • Snorri Sturluson

    Lausnamiðaður?

    Því fleiri sem menntast til hálfs,

    því meira er klifað á skrípunum.

Rita ummæli

Kæfuvörn:   Hver er summan af fimm og sex? Svar:

Eyjan Media ehf. - Kringlunni 4-12, Reykjavík - eyjan(hjá)eyjan.is